大細媽希望盡快拆彈, 決定今早帶我去做割脾臟手術, 順便檢查下在 12 指腸的腫瘤.
昨晚, 大細媽已經同我講,話會在外處露營幾日.
今早, 無早餐食, 又收起左水兜, 媽咪同我落樓下放鬆, 將大小二便清理下, 返屋企再清潔手腳同肚仔.
媽咪仲同我影左張事前相, 幫我梳好毛, 扎好辮仔, 方便在住院時唔會把結, 又唔怕大小二便黐毛.
我知道有事發生, 到診所, 都唔想出袋.
我知無得避, 媽咪陪左我一陣, 哥哥出來叫我名, 媽咪好唔捨得, 將我交俾哥哥.
= = = = = = = = = =
以下是洛媽自白:
我同細媽好忐忑, 始終做手術都有一定風險, 但唔下決定, 血瘤在肚係個無知幾時會爆嘅炸彈, 我已經同細媽講, 下決定後, 要有信心, 但都要平常心來看待.
當我把洛洛交俾哥哥, 出診所門時, 眼淚真係想流出來, 有點生離死別感覺, 真係怕呀.
我下午返工, 手術會在下午兩點後做, 個心真係無法做野, 心情好亂.
17:07, 診所姐姐打來, 話洛洛好利害, 已經清醒. 醫生想見我地, 同我地講解手術情況.
醫生將手術時, 拍起的相片俾我地睇, 問我地怕唔怕, 我地話無問題.
先講脾臟, 同超聲波同CT一樣, 有兩個大血瘤, 仲有粒比較細的, 約一公分. 而脾臟亦都有粒粒狀, 已拎去化驗.
CT報告有提過肝臟, 醫生檢查過, 全個肝臟都有粒粒, 同脾臟類似, 醫生話無可能將全個肝割來化驗, 佢話驗左脾臟, 都會知肝臟大概情況.
而割開12指腸, 就見粒腫瘤, 粒瘤似粒蘑菇形態, 腳部窄, 似粒瘜肉, 唔需要把腸割開來重新接駁, 醫生順便割除. 醫生話希望係瘜肉, 咁瘤腳下連住腸的細胞就無問題. 但如果係惡瘤, D細胞仍有機會留在12 指腸的腸壁.
化驗報告起碼要一星期, 暫時先住三晚. 之後點安排或需要治療, 等報告出先再打算.
咁我地要有信心, 要係良性.
我地聽完報告, 上閣樓住院部, 因驚洛洛見到我地激動, 我地都係去偷望下就算, 見佢精神狀態唔差, 都安心.
夜上 9:30, 姐姐打來, 話洛洛痾左篤大尿後, 現在瞓左覺了, 佢好乖. 因為腸臟動過手術, 又麻醉藥未完全散退, 今晚暫時唔可以食野, 又因有吊鹽水, 所以唔太會缺水, 叫我地安心.
今日係自 2008年中牛B入院兩日, 再離家在外, 洛洛, 加油.
沒有留言:
張貼留言