130217上窰雙徑

昨日長征十幾公里, 雖然條路唔難, 但懶鬼媽咪想今日休息下, 唔好咁辛苦, 又諗住去西貢, 咪是但點個地方o羅....



行上窰都幾好o丫, 一次行埋郊遊徑同家樂徑, 滿足佢想行下, 又唔想辛苦的欲望

兩條徑加埋都係得 5 公里, 絕對俾佢足夠休息....

鬼咩, 佢雙膝蓋不嬲比細媽差, 昨日行港徑第三段中途, 雙腳又來料呀....


媽咪, 全家知你係弱兵, 我好樂意就你....

但條件係下星期六及日, 你諗下帶我地去邊度玩呀 

婆婆, 你又點呀, OK嗎

婆婆年紀大咋, 其實俾佢慢慢行, 一D都唔輸蝕俾好多後生仔女

今早預左天色濛朧, 我地坐的士入元五墳時, 車頭玻璃窗有好多霧水o架....

初春來臨就係咁, 幸好我地今日唔係上馬鞍山及大金鐘附近, 否則一定成身濕....

但媽咪又心思思, 遲些三月份上去九曲山俾杜鵑花, 希望今年唔會遇上中途落雨啦...

我地只係見過一次有人在曝罟灣營地紮營, 細媽話都幾浪費呢個好地方....

今日都唔係影好多相咋....


但每次來呢個崖壁位, 媽咪例必要我影幾張, 佢話次次唔同太陽帽, 唔同天氣喎

我都會配合o既, 睇more勞費份上咋 

今日行山人士比較少, 都係遇上三大隊咋, 咁婆婆唔駛讓路

嘻嘻, 同婆婆慢慢行, 唔夠兩個鐘行完, 算係咁呀 

我又聽到媽咪話一陣去姐姐度, 諗食乜野

我雖然肚仔仲未完全好返晒, 但細媽批准我可以食一個沙律

好耐無食青瓜沙律, 諗起又流口水

今日9 點半先起步咋, o依家仲好早, 我駛唔駛拖慢步伐呢

都係唔埋, 到姐姐度, 我咪飲私伙雞肉乾湯先o羅

細媽話我成日坐到成個懶人樣, 其實我今早仲未瞓醒o架...

轉眼就行晒兩條徑...

時間本來已經早, 諗住中途唔會截到的士, 預左行去北潭涌, 點知行左一陣就有吉載的士, 三個懶鬼就即跳上車, 佢地越來越懶呀