心傷的一幕

今早同洛洛在診所等醫生時, 突然一個女仔手抱一隻淌血的迷你小牧羊犬衝入來, 尾隨一個男路人代拖另一隻雪橇而至。

放下傷重小狗, 個女仔狂哭得好利害, 全身發抖好激動, 細問下, 原來佢帶著兩隻狗狗在家附近散步, 距離診所不遠的交通燈路口, 隔一街口就是佢家, 佢手拖雪橇犬, 而小牧沒繫狗帶站前數步, 正當亮起行人綠燈時, 佢地正想橫過斑馬線之際, 有部紅Van 衝燈過, 仲輾過隻小牧, 紅Van 即時停下數秒, 當時街上有好多人指著紅Van, 司機頭也不回即踩油離開。 剛好一男路人好心, 帶個女仔並代拖其雪橇來一街之隔o既診所, 我地著個女仔報警之際, 碰巧有兩個警察經過, 我地代幫佢叫這兩位警察入來。

此其時, 男護士開門, 好抱歉咁話 : 隻狗唔得喇, 入門前後不到10分鐘咋, 隻小牧下月先到一歲咋

此刻, 個女仔情緒失控狂哭, 警員根本不能落口供, 加上個女仔無帶身分證在身, 警員惟有抄下其剛留在診所的電話及身分證號碼, 待稍後再聯絡佢。

據了解後, 因條例所限, 車輛除非車死的是受保動物, 即牛、羊、野豬等等, 但不包括狗在內, 警方先可以有權控告個司機, 現在警方只可將案件交由交通部跟進, 控告個司機衝紅燈。 如果狗主想追究, 只可循民事訴訟, 向司機追討賠償, 但狗主本身又無做好本份, 用狗帶拖緊狗狗, 自身都有責任o架。

果刻鐘, 我抱緊洛洛, 眼淚微淌, 好心痛呀

忠告大家, 出外在馬路上, 為保狗狗安全, 請緊記 : 為你寶寶繫上狗帶, 並將狗狗跟貼身旁呀！