140330偷時閒遊在城門河畔

仲諗住朝早又雷雨, 我同媽咪大覺訓到 8 點半, 點知昨日回家, 直到今早都無落過雨, 婆婆在家坐坐下身痕, 話不如出去行下鬆筋骨.

僅係舉腳贊成啦, 浪費一日假期就蝕.

其實好邪呀, 當我地換好衫, 快出門時, 突然灑了一陣雨, 好彩快來快走, 當刻都以為作罷, 但大細媽話照出發, 來到沙田先算.

天氣OK喎, 仲有些少陽光喎.

昨日行唔夠, 我同婆婆今日要補返.

去沙角邨食完午飯, 商量完, 婆婆提議要行去划艇會先折返大圍.

我都唔識話事, 大人楂主意啦.

春天來, 萬花齊放, 四處都開滿宮粉羊蹄甲, 又有簕杜鵑, 紅棉呀.

都想去睇下紅棉路, 但天氣不穩定呢.

個天又玩野, 當我地經過單車店不久, 突然灑陣雨, 於是止步回大圍, 但回頭行了一陣又停雨, 大細媽咪見又出陽光, 於是又諗繼續向划艇會方向行. 當入了沙田鄉事會路橋底, 準備經單車路入體育館大帳篷時, 又落起大雨點, 真玩野呀. 無法子又要打斷行程返回大圍, 單車店哥哥見我地行來行去, 相信好好笑.

唔搏了, 一於決定行回大圍走, 中途竟然唔再灑驟雨, 可能天公想我地早點回家休息卦.

一於聽話, 反正媽咪返到屋企, 都要上網趕做公司野.

寧靜的城門河, 小白鷺閒暇棲息, 我都係呀, 只不過地點係屋企咋