140308小瀝源往馬料水

天陰陰, 凍凍地, 婆婆咳, 仲以為無運行, 好彩無乜雨, 細媽話同埋婆婆, 行下城門河都好呢.

想唔到又遇到好多朋友仔, 有見過的, 有新相識.

我地傾左好耐呀.

轉出小瀝源河.

又見到威威同黑黑.

打完一輪招呼, 我未聲沙呀.

今日都算凍, 媽咪見我震, 局住要著夾綿褸.

身唔再打震同凍, 但返屋企又有排梳順毛了.....

唔知點解, 行到沙角村附近, 仲係好早, 未夠鐘食午餐, 一於過瀝源橋, 兜個圈, 剛好就返媽咪藥後食飯時間.

食飽飽, 又係預行去划艇會打咭後, 回頭去大圍先回家.

婆婆, 小心身體, 唔好冷親呀, 快些好, 再等好天, 我地又一齊行山.

今日天陰,仲係有小小雨粉飄飄.

好彩地唔濕, 否則又凍又濕就煩.

到划艇會, 媽咪好奇想知行去馬料水條行人路係點.

反正成日去大圍走, 細媽都贊成試下行去馬料水, 唔好行, 最多回頭.

暫時我都係自由自在.

今日視野都算遠, 但似乎能見度越來越低.

到彭福公園後一段, 單車路及行人路並行收縮.

就算我拖繩行, 大細媽都唔放心, 一於抱我過左呢段路先.

途經馬房時, 細媽見到有個頭伸出窗外.

原來係有隻馬望風景.

準備轉入水廠街, 條路闊左些, 細媽拖我行, 媽咪負責行前面, 擋住迎面而來的單車, 以防單車誤駛入行人路撞到我.

雨點好似大了, 密了.

暫時都無影響我地心情, 因為前方是吐露港, 即快到馬料水.

抵海邊, 一大段行人路, 我又回復自由.

但視野又低, 望對面的馬鞍山一帶屋苑都好迷糊.

褸及腳底都開始濕, 細媽話我唔好行了, 驚我冷病就煩, 於是, 我地行去渡輪碼頭, 坐車回家去.