140315大澳虎山閒遊

上星期, 媽咪早打算來大澳, 因為佢想帶細媽及婆婆食齋.

咁唔係單為左食, 我地次次來大澳, 多數因為行東大古道, 但上年尾, 沙螺灣封村, 來大澳, 就要改變下行程, 第一站先去大澳舊警署.

警署已改為酒店, 上年11時至下午6時, 開放俾公眾入內參觀, 但我都唔入得.

影張相証明到此一遊.

行出小碼頭, 天陰多雲, 雖然望去荒廢鹽田比較濛, 但唔曬, 好舒服.

我在碼頭周圍跑, 好開心, 媽咪話轉另一景點.

原來佢帶我上虎山睇海豚喎.

少林武術文化中心有告示話唔俾狗地入內, 我都唔會違規, 否則, D師傅捉我教訓點算.

中心左邊有清晰指示往虎山觀景台.

沿小徑上, 沿路都係先人福地, 呢度一定好好風水.

小徑轉彎位左邊, 媽咪見有咁開揚路, 似是防火線, 於是又八卦下, 究竟係咪去先人福地呢

嘩, 上高些, 望晒大澳一帶, 巧正.

 因為婆婆無跟上來, 而且打後的路比較斜, 我地落返小徑搵返婆婆.

我地真係見到白海豚呀.

只不過係石屎之o麻

以前呢度係山路, 但為左吸引及方便遊客, 變成了人工化石板徑, 全港好多郊野或離島都有差不多樣貌的石板徑, 熟口熟面.

四周無樹蔭, 太陽烈日當空, 就肯定熱傻.

所以媽咪揀未入夏時.

跑幾轉都唔會氣喘中暑.

我第一次來咋.

盡頭係點呢

原來盡頭係涼亭.

媽咪 : 唔係, 仲有路呀.

咦, 係喎.

原來仲接返入山路.

媽咪話唔行回頭路喎.

我仲以為今日唔行山.

原來有山路行, 幾好玩喎.

因為我地上左75米高的虎山, 咁僅係要落山啦.

媽咪知可以行返落去寶珠潭, 居高望狗伸地和寶珠潭, 仲有對面的象山及獅山.

因為係落坡幅都幾斜, 仲有零碎石仔, 但只要踏穩大石頭, 同抓緊旁邊樹枝.

婆婆都應付到.

今日無雨, 地面乾爽唔滑.

山路會接返水渠位, 仲有尼龍繩.

然後落返石級就到平路.
有行山人落下的絲帶指引, 唔怕o架.

當回到大路, 媽咪見左邊有路, 又八卦行去, 原來盡頭係大澳隱化池.

跟住回頭去返狗伸地觀景亭, 睇下有無運見到白海豚, 當然係失望啦.
對出全是工程躉船, 工作台及大船, 白海豚生活地點已經被影響.

又走去楊侯古廟停一停, 時間差不多, 要搵食.

我地行去南涌村食素.

本來媽咪打算帶細媽及婆婆幫襯東方小祇園, 事關佢食過, 味道好好. 點知竟然摸門釘, 星期六都休息, 惟有轉去另一家. 我當然乖乖在袋瞓覺豬, 休息一下.

大人食飽, 又到我自由跑時間.

長長海濱行人走廊, 雖然都有單車來往, 但大家都好禮讓.

兩點咋, 見遊人唔多, 媽咪話沿永安街行去二涌同三涌, 即係又入返棚屋村一帶.

龍坑紅樹林好靚呀.

我地沿龍巖寺轉返入新基路, 大澳行大運.

行左一圈, 竟然多左好多人.

細媽拖實我, 怕我沒入人腳中, 又怕我誤入人家屋企.

到市中心, 都係要抱返呢.
時間差不多, 係時候要走.
今日真係好悠閒, 講真, 單單只入來大澳 Hea, 對我來係好悶o架, 如果唔係行過一段山路, 有得跑過一輪, 我真係會投訴佢地呀.