141018騎虎難下之荃錦坳/白石橋/甲龍古道

上星期, 婆婆提議行甲龍林徑去雷公田牛奶公司食撞奶, 點知早兩日, 大姨媽想約埋一齊行, 我地話咁在荃錦坳附近行下, 先落去甲龍林徑.

大姨媽有備而來, 佢話有地圖, 無有怕, 先行荃錦坳自然教育徑.

我地以前都自已行過幾次, 熟晒,

"人生無常, 山水依舊", 誰的塗鴉, 似破壞環境多.

今日天氣好好, 但陽光下都熱.

大姨媽話繼續 Hea行自然教育徑.

行到分岔位, 大姨媽話帶我地去新地方, 見到白石橋指示就轉右.

無行過, 都幾新鮮.

仲要過小水霸.

行行下, 開始覺被騙, 明明話 hea, 何解會行到被密草遮路, 我仲全身都係針草.

大姨媽話落左一段山路, 又係上山時段.

又見路牌, 本來大姨媽話我身後有捷徑, 但我地見路密晒, 唔睬佢.

原來呢帶係保育區, 呢度真係少人煙, 可以保留大自然生態.

大姨媽話"路不通行"牌後係有一片好靚景, 佢地成日來玩野外定向, 我地又唔埋佢.

行行下, 突然見有一大片平地, 原來呢度就係白石橋, 唔好以為得咁細, 因為有樹相隔, 過樹又見另一片, 大細媽成日以為白石橋係條橋名.

大細媽想起, 未有我時, 大姨媽好似帶過佢地來玩定向, 但係是由另一個位入來.

抬頭望, 見好多果實, 媽咪認得係茶樹果實.

因為唔係熱門路, 樹塌了都無人來清埋.

因為有越野單車擅自衝入山徑, 大姨媽怕單車撞到我地, 帶我地行遠少少避開危險, 但要攀斜坡上.

我地都係無心埋準備玩咁大,

騎虎難下, 婆婆努力攀樹爬斜坡.

又話會見寬闊路, 又被騙.

但沿途有大姨媽講解四周環境, 又幾新鮮, 雖然媽咪知有小徑, 但未行過, 都唔會貿然帶我地行.

我細粒, 易過, 大人要彎腰.

又另一難度, 好考我, 我仲俾大姨媽笑.


婆婆都係咁, 咪又係要爬過.

又過關.

呢帶好多地洞, 媽咪話似蓮花山一帶.

轉返出車路, 呢度邊度 ? 好熟悉.....
婆婆唔識路, 扮代表話向下行.

原來係蓮花山段, 怪不得啦, 我地以前行過.

嘩, 要上大斜接返上麥理浩徑.

大姨媽一定有預謀, 佢帶多了兩公升水同蕃薯分俾大細媽及婆婆, 我地小休了一陣, 再向荃錦坳方向, 搵返個指向河背的路口.

我地路過無數次, 從未有打算行呢條小徑, 因我地都唔想去河背, 果邊離開較麻煩, 但今次由大姨媽帶去行甲龍古道, 我地先揀咋.

嘩, 又係密叢, 小徑好窄, 一邊係斜坡, 惟有跟實大細媽腳後, 否則我根本睇唔清前方, 好易叉錯腳.

又沒入在密草.

呢個好危險, 小徑係窄又斜, 細媽全程怕我個袋黐晒針草, 惟有拎高, 緊緊攬實.

婆婆步步為營.

其實四周環境好靚,

只係路途崎嶇左.

婆婆一路行, 一路不停拔草針, 拔完又黐, 黐返又拔, 好忙.
我就返屋企先算了.

原先我地計劃行甲龍林徑, 大姨媽改左我地計劃去甲龍古道.

好多年前, 第一次係大姨媽帶媽咪路, 當時兩位表姐仲細.

今日, 我地自己識路, 都行過, 但都係幾年前事.

全石砌下山路, 潮濕時, 絕對唔適合我地行.

婆婆似無倦意, 見到棵樹又話好大, 要攬, 樹幹太大, 攬唔晒.

見另一棵, 又攬, 今次熊抱成功, 笑晒.

太耐無來, 無印象途中有溪流.

終完成古道了.
又話 hea, 點知玩到成三黠, 又未食午飯, 原本去牛奶公司食撞奶, 來回又要玩多段路程, 怕遲走, 好難在元朗有位坐回家, 惟有出返路口, 結束今日旅程.