141011大棠半走圓墩郊遊徑往深井

上星期, 媽咪見預告有季候風來, 今日會多雲, 間中有陽光, 有早上可能有些驟雨, 咪即秋風送爽, 於是安排半長征, 由大棠經楓香路, 半走圓墩郊遊徑返深井.

 清早收到大姨媽電話問我地去邊, 佢要返工, 但可以早走, 佢想拎厚外套用品俾媽咪遲些用, 話稍後聯絡我地.

昨日都話多雲, 但來到大棠, 鬼咁好陽光.

希望唔曬傻.

楓香樹仍是綠色.

遲些入冬, 賞紅葉, 要安排早些來.

預左大姨媽揾我地, 又唔知佢幾時來, 點來, 我地惟有拖長時間來行.

拖長時間, 我就周圍八, 唔駛趕.

終於大姨媽來電, 但網絡接收訊號差, 媽咪要不停打.

快到吉慶橋時, 終於接通電話, 大姨媽正坐巴士, 打算在大欖隧道揾路入來匯合我地, 我地繼續拖時間.

到呢個交界位, 我地按原來路線往圓墩郊遊徑前進.

在元荃古道入口, 有間儲物室, 我次次都入去巡視, 當大細媽估緊我入唔入時, 我已入來視察.

上圓墩郊遊徑, 媽咪努力打電話.

點都無訊號, 打極唔通.

終知道大姨媽開始由大欖引水道入來, 都有四至五公里, 好遠, 以大姨媽足速, 應好快追來.

到元荃及圓墩兩徑交匯點, 我地又停低玩, 細媽搵枯枝在地方擺箭咀標誌, 媽咪砌"大 E MA", 細媽學人放兩舊石頭在路牌上指向, 今日少人行, 應該無人拆卦.

雖然有樹蔭, 但真係好熱, 沿路有溪水, 我自行落水浸, 細媽幫我淋背降溫.

浸完真係涼返.

唔通早排颱風吹斷樹枝, 樹蔭疏了. 又接到電話喇, 大姨媽已到 C6319, 媽咪記得我地過了 C6318, 我地係逆行, 即我地相距好近了.
途中, 有兩部違規越野單車迎面來, 希望唔會破壊我地俾大姨媽的提示.

途中又見有小溪, 媽咪陪我落水.

終於, 大姨媽在另一小徑出現, 原來, 佢拎定地圖, 用捷徑追我地, 今次係佢第二次在圓墩郊遊徑追來匯合. 由佢坐車由觀塘入來, 到匯合, 都係兩個鐘咋.
問返大姨媽, 佢唔見地下提示, 但見有兩舊石頭指向, 估可能係我地擺 , Bingo

齊人, 唔駛專登拖慢, 可以按正常足速行.

但唔係快左.

婆婆又係東張西望, 只係少左心掛掛, 唔駛擔心遇唔到大姨媽.

行左一半郊遊徑, 我認得可以接上清快塘段車路, 未問大細媽, 自行行上去. 我地小休後, 細媽知我攰了, 我上私家車休息.

休息十分鐘, 夠晒, 又自已行.

呢段時間, 蝴蝶特別多.

轉到呢段路, 陽光被山擋, 有風吹, 先覺有秋意.

到更亭, 唔係以前的叔叔, 唔通佢無再在此當更.

八點半起步, 都快接近三點, 玩左咁耐, 全家行到成身汗, 好夠.
快 10 月中, 都仲咁熱, 下星期行邊好呢