131228烏蛟騰荔枝窩三椏村一圈

咦, 我地未夠 9 點到, 究竟今日行邊呢 ?

哦, 媽咪話近排天氣好, 今日排到去叫鴨喎

成年無由烏蛟騰郊遊徑起步, 我地會繞一個圈經荔枝窩去三椏村呀.

除左頭段上一大段石級, 基本全日路程都唔難.

到呢個位, 竟然唔見左張長木櫈, 我次次都坐下o架.

大部份在樹根穿梭, 無太陽照在身, 我耳朵都仲係涼涼, 無暖過, 唔可以除衫呢.

又到阿媽笏.

見到直昇機坪, 雖然係好天, 但煙霞多, 望去印洲塘都好濛, 唔駛影相.

到分水凹, 當然選擇轉右去荔枝窩.


連續兩次, 我地都經珠門田及梅子林村過荔枝窩, 今次揀返左邊荔枝窩方向, 咁就可以行埋去荔枝窩特別地區及自然步道.

特別地區, 有風水林...

有五指樟...

呢段令細媽難忘的木板路, 每每全家都小心翼翼望實地下行o架.

霸道的榕樹...

背後係通心樹 - 秋楓...

客家村落...

因為大廣場有好多村狗, 雖然佢地超級乖巧, 但又對我好有興趣, 細媽惟有抱我過...

為左保護白花魚滕, 木板步道要封閉, 希望白花魚滕終有一天回復舊貌.

步道一帶, 都有好多板根呀,

其實印洲塘荔枝窩一帶, 有矮大葉藻, 我地 08年來時都見過, 但呢幾年都無再發現了.

小灘上三椏村一段舊水泥徑, 改鋪了石板路, 好行了, 但又覺人工化左D.

行行下, 又變左大石春路, 好奇特.

我地 12 點 4 就到合益蜂場喇

三位女子, 期待已久的美食出場

客家炒米粉同客家釀豆腐超級好食, 紫菜心清甜, 仲有必食三杯鴨, 得三個人, 唔可以叫太多, 但今日洛家三女子都超滿足

我咁又花左個多鐘等佢地醫五臟廟, 算啦, 佢地話行咁遠入來, 唔食返餐好, 會蝕喎

仲早呀, 不如出去碼頭仔望下有無海洋生物先...

今日只見魚, 無其他品種, 唔通凍, 唔游近岸

回到十字路, 抬頭望, 先為意上下路只差 1/4 公里咋, 媽咪話想行去三椏涌影相, 就行下路啦.

上路, 下次先再揀你

下路有靚紅岩石, 陽光下, 會好靚的.

人流無了, 我可以慢慢等媽咪幫我影張靚相.

三椏涌...

我地成日聽到流水聲, 以為快到大岩石邊小河, 就快到烏蛟騰, 睇清指示牌, 原來由此到烏蛟騰, 仍有成 3 公里.

我地專心行, 少了影相.

不經不覺又到上下路交接拉.

過左九擔租, 往常見到的中一大片翠綠風水林, 竟然係楓香來呀.

到烏蛟騰村, 本來媽咪想我單獨影張相, 但有幾隻村狗慢步行來, 我好無奈又要同細媽合照呀.