131019石壁郊遊徑

晨咁早出門, 搭了兩程車上來, 9 點唔夠到昂平, 唔係來參觀大佛呀.

係媽咪打算今日行彌勒山郊遊徑咋


大佛一帶, 我都唔入得, 肯定過門而不入喇, 仲有今日成十多隻大嶼山街坊, 見我就吠叫, 又跟實我, 迫住細媽挽實我, 媽咪大聲喝止佢地唔好跟來, 最後佢地乖乖回大佛底

今日天氣相當好, 到來陣陣清風, 有點涼意.

去彌勒山, 可以直去昂平奇趣徑或由心經簡林再轉過去, 我地打算去心經簡林, 回程由另一邊回昂平.

話咁快到, 時間早, 我地包晒場

在家悶左幾日, 我來到好興奮, 周圍走, 唔肯定, 媽咪叫左我好耐先定定等佢影

我地見唔夠十個人由鳳凰山下來, 應該係今晨在山頂觀日出.

見到呢個牌, 大細媽又想起05年 1 月1 日, 當時仲未有我, 佢兩個在氣溫得 4度下來到呢度, 膽粗粗行落去石壁水塘, 呢段山徑, 當時覺得某段多碎石, 但都OK.

跟住復活節假期, 又帶埋婆婆來行此郊遊徑, 但此次出了意外, 婆婆失足跌倒, 卧在大石上成隻烏龜咁, 動也不動, 當時細媽大聲驚叫, 媽咪以為婆婆跌倒時, 撞在大石暈倒, 猛叫婆婆, 幾秒後先有反應, 原來婆婆當時比較肥胖, 唔識自行反轉身, 當媽咪慢慢扶起佢, 發現婆婆血流披血, 大細媽好驚, 於是用紙巾幫婆婆抹掉臉上的血, 原來婆婆額頭撞穿了唔夠一厘米傷口, 休息一會, 止血後, 最後都安全回石壁水塘.

此次意外後, 大細媽認定呢條係路太艱難, 有陰影, 一直唔敢再行, 甚至有我後, 都無考慮過.

但細媽竟然提議行下, 佢話全家得我未行過, 而且意外都係 8 年前事, 當時佢地剛剛開始行山, 無乜經驗, 而且兩次都係由東涌經石門甲行上來, 已經攰了. 但今次係未開始正式起步, 慢慢落, 相信應付到

提議一出, 婆婆即時和議, 原來有幾次來到心經簡林, 佢都想試行, 今次佢話要挑戰自己, 打破全家心魔


其實我一到, 都已經決定行呢條徑, 都係 5.5 公里o者

快踏入11月初, 芒草出現了.

頭段唔難o架.

終於見石壁水塘滿溢.

因為係落山, 當然有石級.

但好多路段, 野草生得頗密, 我跟在細媽後行.

天氣好, 又唔算太曬.

而且時間及山勢原故, 我地多數在樹蔭下行.

一時又會行到開揚位.

一時又到密草堆.

全段碎石多, 我都係慢慢行.

腳底按摩呀.

婆婆, 碎石多, 易跣倒, 小心為上.

可能呢幾年多出外行山, 見過不同地形, 覺得唔係當年咁難行.

細媽話上兩次, 到呢個位, 都有人坐著休息, 今次無人呀, 我可以同水塘合照.

遙望觀音山及羌山.

媽咪依稀記得, 當年婆婆就係大約在呢段大石斜岥出意外, 但今次行, 又唔係咁難,  8 年行山所累積經驗, 真係唔講得少

 細媽發現, 呢舊破裂大石, 裂開又打斜, 大自然就係咁神奇.

秋季宜行山.

但媽咪既愛且恨呢個時刻.

呢 D討厭黐頭芒, 一掃就纏身

一纏唔甩, 仲要纏到全身毛毛打晒結, 有排搞

煩野由大細媽負責

見到呢條似水渠石級, 即係快行完.

終於全家打破心魔, 順利又輕鬆行完全段

到野餐區, 一大片草原, 仲以為又可以輕鬆休息下.

原來要做行山善後工作, 就係先將全身黐頭芒同雜草清除
最後大細媽夾手夾腳, 用左 40 分鐘, 先將 9 成幾黐頭芒拔掉
唉, 我企o係呢個石牌成 40分鐘, 仲攰過行山呀