090330睇大戲

多謝爹娘轉贈的兩張大戲飛, 今晚就來我同怪獸的第一次 – 睇大戲

本來今早一起床, 又頭暈, 又嘔, 又肚痛同痾, 連工都返唔到, 以為晚上都出唔來, 好彩食左一樽保濟丸, 睡一睡, 勉強都OK


咁大個, 都未真真正正睇過D老倌, 著住戲服在台上, 唱住河車o架

原來粵劇起源, 係由於清朝末期知識分子, 為左方便宣揚革命, 而把演唱語言改為粵語廣州話, 等廣東人容易明白。而粵劇在2006年5月20日, 正式名列入第一批518項國家級非物質文化遺產名錄之內。


 

原來開場唔可以影相, 無法影但D閃耀繽紛的大戲服

全場絕大部份都係老一輩長者, 看不見十來二十幾歲的年輕人, 驚不得, 好多人都怕粵劇會好快失傳啦

開始入場, 各人魚貫入座, 坐我右旁是一對夫婦, 但位太太猛發嚕騷話 : 好鬼嘈, 成個街市咁, 早知俾多D錢去新光睇. 我心底頂佢唔順, 去新光, 咪又係呢班愛睇大戲長者, 唔通去新光會身份高貴D, 就會鴉雀無聲咩

戲幕拉起, 全場都好寧靜地欣賞, 間中有搞笑位, 全場發笑後, 又回復寧靜去欣賞, 觀眾真係好尊重演出者

初初未開場, 都怕好悶, 加上有點唔舒服又發冷, 真怕會中場走佬, 但一幕又一幕, 我好留心同投入每個字, 竟然可以睇晒全場

但美中不足係, 可能時間關係要交場, 應該刪減左一兩個劇目, 臨尾時, 所有名伶都開始有些失準, 我好多都聽唔清佢地咬字, 搞到唔明講嘜, 仲好勉強草草埋尾

經過呢次, 原來我都可以好認真, 好有耐性去欣賞呢種傳統曲藝