昨日長征完, 回家都幾攰, 天氣又潮濕, 媽咪懊惱今日去邊好.
細媽突然腦子叮一下, 話不如去烏溪沙心心喎.
好凍咩, 今早烏溪沙外的沙灘無人游水呀, 仲無乜人呢.
海之心的冒起, 旁邊多了其他巨型圖案及字.
以前的海之心已毁, 只餘下舊跡, 唔知係浪衝走石頭, 定係俾人拎走石頭呢 ?
但在遠處, 一個較細的海之心又砌起來, 係伯伯想將原來海之心, 慢慢移位嗎 ?
真係唔清楚, 無從搵答案.
細媽話今日沿海邊小徑, 行去渡頭村再回頭.
起步時, 都幾多來往單車, 好彩呢度少左.
媽咪 : 你又入草叢八卦, 一陣又黐到全身草啦.
唔八喇, 唔八喇.
雖然唔係泥徑或沙灘, 我都跑得頂開心.
在渡頭灣外.
入村時, 村內每屋都有狗狗, 佢地吠我, 好彩有大細媽輪流抱我咋.
仲有, 都搞唔清呢度叫渡頭村定渡頭灣村, 事關兩個村名都有牌寫.
原路折返, 今日有慈善長跑.
原來其中一個項目係愛心大步的別開生面的三公里賽跑, 參賽者要著起充氣服裝一齊比賽, 今年係相撲手造型.
唔知會唔會好悶焗呢.
唔想太早返歸, 細媽話我雖然唔入得海濱長廊, 但旁邊行人路可以行, 一於行去大水坑.
為免我擅自行出去單車徑, 細媽要我著定動運衫, 以防萬一, 但我好乖, 一直在行人路行.
到簕杜鹃園外, 或者昨日真係太攰, 細媽問我上唔上私家車, 當然上啦.
往車站途中, 有人帶龜散步, 仲要係一隻超巨大的陸龜.
婆婆見到當然開心, 再問佢主人, 原來只有 9 歲大咋, 咁仲會再生長幾多呢 ?
媽咪後記 :
望實呢八條腿, 好感恩, 因為呢八條腿, 推動我由深閨變積極, 為佢地去發掘適合的山徑行程, 原來, 我係好多事都可以做到的, 感謝呢八條腿.
沒有留言:
張貼留言