140712城河晨操

細媽話近排都係清晨落驟雨, 如果因為咁唔出去, 肯定成個夏季在家發霉生菇.

今早又係咁, 我地因此遲了起身, 遲了一班車入來小瀝源.

婆婆上左車先醒起無帶遮, 佢仲想落車返屋企拎, 咁佢走左, 我地唔通在沙田呆等咩....., 如果齊齊回家又浪費時間同錢, 媽咪阻止婆婆, 咁全家有兩把遮都應付到雨啦

但有厚雲先好, 起碼東方升起的陽光, 剛好俾雲擋住.

婆婆唔駛擔遮, 可以雙手做甩手操.

而我...., 我隨意踏, 行到半身濕都得, 都返去沖身, 唔駛緊張污糟呀

等我聞下呢隻龍船花香唔香先

洛B : 無味喎
細媽 : 咁點解你聞到全嘴白泡呀, 好似人家索完野咁
洛B : 係咪

走到城河畔, 厚雲仍在.

細媽叫我地抬頭望, 原來有鶵鳥長成, BB羽毛仲未甩晒.

本來雲層都算高, 媽咪又上網睇天氣, 知有一團雨雲掃來, 我地剛好離開橋底不遠, 立即返橋底避雨.

望住雨雲飄來飄走, 天氣一半藍天, 一半陰天.

呢個幾月就係咁, 其實又幾靚o架.

雨後陽光, 但陽光被高樓擋, 就係我地揀來城河晨操o既原因.

洋紫薇花掉在地上染紅.

大葉紫薇令綠草添紫, 增添色彩.

又要就時間食早餐, 我地在打咭位過沙燕橋去對岸.

平時早上一定唔行呢邊, 太曬呀. 今日厚雲先由呢度繞多圈咋.

我仲好精神呀.

有人叫肚餓, 等我行快步搵個冷風機位先.

大人開餐, 我都飲埋雞湯.
坐定後, 我不知不覺, 伏在檯邊, 走左去同搵周公子傾下竭呢