141206東區自然步道

前一、兩日都有雨, 而且又凍, 又怕地未乾透, 為婆婆安全計, 我地唔會行山路, 好耐無去港島行, 一於行東區自然步道啦.

仲以為在陽明山莊會有強風, 又唔算勁風, 但都唔久留.

媽咪好鍾意呢帶的攀籐植物, 所以我個部落格都用呢些做背景.

楓香仍未紅, 要再等.

天上厚雲, 又間中陣陣風, 起身時係震震B, 大細媽唔敢幫我除褸.

我好興奮跑落來水塘, 但都係熱唔到身.

點都唔敢笑, 驚溫氣由口中溜走.

太陽係出來, 但四周都有似太陽般燦爛, 又似煎荷包蛋的茶花.

每朵都有我個頭咁大, 但唔係叫大頭茶呀.

為左令身體暖, 快步行係最好.

衝呀, 唔好停.

每次行東區自然步道, 我地都會行遠些, 過H065, 轉入柏架山道上返大潭水塘霸底.

見藍天.

但溫度都係十幾度咋.

到霸底, 唔知霸上情況係點呢 ?

兩邊都要行石級上, 婆婆心大心細, 咪又係跟我地行呢邊.

嘩, 唔係卦, 又來大風.

險些企唔穩.

好彩無除褸, 有褸頂一頂, 無變雪條.

到水塘霸頂, 陣陣疾風, 吹到我變型.

行到大霸另一邊, 有位擋一擋, 仲可以保持儀態.

凍凍天氣, 呢隻蟋蟀留在婆婆手, 點都唔走.

無風下, 擺個心型頭pose, 細媽最愛呀.

行行下, 突然聽到有人叫婆婆呀, 我地都好八卦, 周圍望有邊個婆婆, 原來有位叔叔, 認得婆婆同我, 佢話上年在打瀉油坳見過我地, 大細媽想起, 當時, 大家都有傾偈. 叔叔同佢朋友講, 其實大家唔識, 只係佢以前有睇我個blog, 知我同婆婆成日行山. 事實上, 我地行山, 好多時都有行山人叫我, 認得我呀.

因上斜, 又接近中午, 溫度回升, 呢度無風, 我除返褸.

但一抵大風坳, 全家又要著返衫.

話明大風坳, 風勢特別勁.

好彩都係一段路, 過了就無問題.

又係茶花盛開季節, 但要小心, 因為我肚仔會常沾上黃色花粉, 有次, 媽咪以為我尿尿有事 XD

九龍區似有藍天.

呢邊仲係厚雲, 只係見過少少陽光出現.

都仲早.

返去哥哥度, 又可以食下午茶.

點知, 土瓜灣大塞車, 坐車坐到傻, 好耐先落到車.