131123大浪灣遠足徑

上星期挑戰完畢, 都要回下氣先, 媽咪應承婆婆今天揀條輕鬆路呀.

昨天早上落過一兩陣雨, 細媽話唔好行泥路, 怕樹蔭位下未乾透, 佢有陰影呀

咁一於行大浪灣遠足徑, 都係 12.5公里, 希望去到西灣唔會又被封路啦

連續幾星期, 天公都俾個藍天白雲我

到赤徑村第一間村屋外, 竟然有些不道德行山人, 遺棄一大堆消毒用物, 膠布, 棉紗同消毒藥水等等, 仲有防風反光膠布, 相信係某些賽事後留低, 大細媽執了一大包, 太過份, 行多20-30呎就有垃圾桶咋, 又有山水水喉洗手, 咁方便都唔清理.

有點點風, 好舒服.

今日都幾多行山人, 有外籍, 有國內人, 當然也有好多香港人, 有些人逆行而來, 相信西灣村可以順利通過.

婆婆, 我地上大浪坳喇.

路係斜, 但比上星期易好多, 婆婆, 我地今日唔趕, 唔駛急, 但要快, 冬天 5點半已黑齊, 大細媽怕黑

捱到大浪坳, 休息下, 又落山.

今日蚺蛇尖無怕羞呀.

一見大浪村, 我好醒見停低, 等媽咪抱我過, 因為內有村狗, 雖然係唔惡, 但佢地就對我有興趣呀

又到鹹田村, 我又停步等抱過.

鹹田村兩間士多, 原先的遮蔭帳篷都拆了, 相信係政府話係僭建物, 拆了全改用太陽傘.
媽咪無帶雞肉乾, 所以無去安記士多探大浪西灣兩兄弟, 因為佢地現在成 8-9 兄弟, 媽咪唔夠糧餉呀

今日水位高, 又有季侯風, 婆婆本來唔想行, 但佢又唔肯返轉頭行麥徑, 佢行過木橋時都呱呱叫, 我都腳軟, 好彩媽咪錫我, 抱行晒全條木橋, 而婆婆就自己來

過晒橋, 腳踏沙灘, 心情突然變興奮

跑沙灘係我至愛

大浪都唔識驚了.

仲有另一愛好 - 掘沙

但今日無做另一愛好 - 碌地沙, 扮乖呀

蚺蛇尖只可觀, 不可及

今日涌浪有成一米高, 但仍有人落海玩呢.

鹹田灣, 下次見

咁好天氣, 唔知聽日點呢

我地途中, 見到兩隻兩個多月大啡黑狗BB, 一隻黑毛狗, 一隻黃啡毛狗, 懶洋洋瞓在路邊曬太陽, 唔知隻黑狗, 會唔會係大細妹親戚, 因為當時見有狗, 媽咪抱過, 無法子影相.

到西灣啦, 但浪比鹹田灣細.

而四疊潭流下的河水, 變了內湖, 年年地貌都改變, 下年又會點呢

好多人會揀爬斜坡落, 節省時間, 但我地有婆婆, 都係安全D沿麥徑行.

今日副灣好清潔呀.

咁大浪, 都係唔落正灘玩, 直接入村離開.

順行通過, 但都仲有村民上次封村遺留的鐵網同橫額.

媽咪怕我年紀開始大了, 似有點倦容.

唔係呢, 係我在樹蔭下, 合埋口防走溫, 我仲識笑.

冬天係凍得快, 咁快覺得有斜陽閃閃照水塘.

我地今日慢慢行, 0915北澤坳起步, 1450已經到西灣亭, 舒服完成今日行程.
初初諗住坐的士出市區, 點知剛好有加班村巴來, 村巴叔叔認得我地, 未停車已經揮手同我地打招呼呀, 佢話好耐無見我地, 僅係, 我地入秋就四處行山, 叔叔只我地入多D來西貢呀