130612婆婆失蹤記 之 偏離航道、去左第度

每逢端午節, 都會落下雨, 今朝早都係陣陣細驟雨, 細媽見媽咪昨日左腳跟突然痛, 俾佢同我食完早餐又要瞓多陣, 差不多時間再我地起身行下城門河



商量好, 決定由小瀝源河由出去城門河, 但見有時間, 我地諗住再行入小瀝源河源頭, 究竟係去邊度

原來係可以行去小瀝源村同恆生商學院, 下次我地又可以行多段回頭路, 拖長行程啦

兜一個圈都好舒服, 有樹蔭

出返小瀝源河啦....

嘩, 想唔到雨後陽光, 好彩在陽光又唔算猛烈

到石船, 我地見有好多一家大細散去, 相信龍舟賽已經完結

今日同平時星期六日, 多了很多一家大細, 大細媽咪怕小朋友走來追我, 佢地亦步亦趨跟隨我

賽事完, 仲有好多龍舟停在河中....

我地避開比賽時的人潮, 就係怕我在人潮腳下行, 俾人誤踏

反正我都唔識睇比賽, 我最想係自由行之o麻

我地遲出來, 點都要行去沙角邨食午飯, 再繼續行程啦

飯後再行, 太陽伯伯俾雲擋了, 唔熱呢

陣陣清風, 雖然又係城門河, 我一D都唔厭

好多人都會倚欄眺望河畔景色, 我都唔例外

時間仲早, 我地想再行耐多一段, 咁又可以就晚飯時段, 唔駛返屋企, 要細媽又辛苦煮飯

沙田中央公園外, 今日又聚集好多人, 佢地逢假日都拎晒擴音器來唱歌跳舞, 有時都好多走音o架, 但佢地沈醉在自得其樂

我地都唔會停留, 唔識欣賞走音歌王歌后

到大帳蓬, 好多比賽竹棚都拆了...

我地樂在途中....

擰轉身準備回程行往大圍, 竟然唔見左婆婆影蹤, 明明跟實我地, 因為一直以來, 婆婆都係 hea 住行, 我地行一段路就會回頭望, 按道理婆婆行得慢, 我地平時回頭都係咁搵返佢

我地估婆婆一定又係自己停低八卦, 跟住以為我地已經回頭, 就趕去追我地, 於是我地急急步, 不停係咁追, 但都係追極都唔見婆婆, 無理由佢會快成咁o架

我地沿平日路線係咁追, 由沙田中央公園追到大圍, 都唔見婆婆, 媽咪以前問過婆婆, 如果在沙田走失, 婆婆話識行去搭火車返屋企, 我地惟有帶著忐忑心情坐車回家等佢
終於婆婆失蹤兩個小時後行回家
原來佢自己又細細聲話去廁所就行開了, 我地都無聽到
佢回頭唔見我地, 又唔記得大細媽曾經吩咐,  如果唔見左我地, 佢要停低唔好周圍走, 我地一定好易搵返佢....
佢過左沙鵲橋, 行左對岸, 再行左去車公廟附近搵我地, 怪不得我地按慣常路線都係搵佢唔到, 佢偏離航道, 去左第度
好彩佢識問個好心伯伯, 帶左佢去車公廟外的巴士站, 坐巴士回來
大細媽知婆婆聽力差了, 都預備抽空出旺角買三部 Walkie Talkie, 一人一部 

經此一役, 大細媽都係要加快安排, 暫時解決方法, 就係再多加留意同將細媽個手提電話俾婆婆跟身先

驚嚇兩個鐘, 我沿途一路追, 都無閒飲水, 細媽安排終極一糭俾我今晚定驚

呢隻糭係將所以餘料包晒, 特別大隻, 希望食完, 全家平平安安