130609陽光中的大驟雨

昨日去完游水, 夜晚已開始雷雨, 一直落到今早8 點先停雨
所以細媽拍板星期六去游水, 絕對英明
細媽見停雨, 立即叫醒媽咪起身出發去玩



昨晚天文台預告係灰雲加二條雨, 媽咪打算去大美篤行大霸, 陰天行大霸唔會太辛苦

但想唔到雨後咁好陽光, 全條大霸來回 5 公里, 無遮無擋, 我會變熱狗, 所以又臨時轉移陣地

我都知佢地成日, 五時花, 六時變, 都係為左我同婆婆, 我無投訴, 但你地都唔好投訴我坐在水中央

我地又係由大水坑行去大圍, 但今日天氣熱, 到呢個位, 唔俾我自由行

其實佢地知我想行去遮陰位, 即單車路, 但佢地怕影響騎單車人士, 佢地堅持要拖我

唉, 狗在江湖, 身不由己, 我都會就範, 只要在適當時候放我, 我唔會去投訴你地虐兒

到碧濤花園, 我地唔行出去緩跑徑同單車路, 選擇在內街行, 咁我就唔駛被陽光曬, 仲有好好風添, 又可以自由行, 一舉兩得

途中都有陣陣邊皮微驟雨, 當過了石船, 望落雲雨向我地飄來, 我地都要停停等雨過, 灑陣雨, 雖然地濕了, 但舒服好多

地磚去水快, 一陣就乾

當我地行到危險地帶, 我即時有危機意識, 叫細媽抱抱
今日都唔見癲雀, 唔通佢搬走左

河道已經準備好晒賽道號碼旗幟, 相信端午節又人山人海好熱鬧

中午又到班女子午餐時段, 時間未到, 我已經成日聽佢地商量食乜, 成日掛住食, 我地當然又係行去沙角邨啦

好好彩, 我地又在茶王100分搵到外圍冷風機位, 陣陣涼風, 好舒服, 不知不覺入眠


佢地有佢地慢慢嘆, 我有我

我失左知覺, 中途發生乜野事, 我都唔覺o架

睡醒精神爽晒, 繼續往大圍方面...

點知到乙明邨對出的海濱公園, 突然來一場傾盆大雨, 起初以為係細驟雨, 全家企在樹底遮雨, 最後迫住要跑去隧道避雨

估唔到今日同陽光玩遊戲後,  又同大驟雨玩

臨近端午節, 通常都係時陰時雨, 今日都無決定錯誤, 如果傻傻下照原定計劃去左大美篤, 在大霸中又曬, 又遇正大雨, 進退兩難

又食又玩五個多鐘, 全家都滿足, 又到時候回家, 我估下星期都係來城門河畔
無法啦, 行山變熱狗, 落雨滑傻婆, 我地為安全, 都唔開拓新玩點
期待入秋快快來, 因為媽咪已經有晒新行山路線, 等緊天時地利人和就成行