130324同天公賭一賭

又預告今日會有驟雨同狂風雷暴, 本來細媽話行下單車路當運動左就算, 但復活節都係唔會好天, 媽咪話按雲圖同氣象圖, 應該要中午打後先來雨, 雨亦會由西向東移, 一於同天公賭一下, 搏搏可否偷到兩、三個小時行下
西貢主要行山路, 去深井行石屎車路係最安全, 細媽話如果落大雨, 抱我行都OK, 一於揀深井

當我地準備出發時, 有位老婆婆行來讚我, 又話婆婆好幸福, 有兩個女陪行山, 佢有個仔, 好少陪佢地兩老, 好彩都算錫佢地, 每月都俾幾千蚊佢地用, 又搬來深井住近佢地方便照顧, 老婆婆話仔就係咁, 唔會成日在父母身邊, 佢唔係羨慕婆婆, 係叫婆婆行多些山, 行山身體好, 佢自己已經84歲, 比婆婆大10 歲, 行山好多年, 身體仲好健壯, 唔駛用拐杖, 自己仲可以輕鬆出來買菜煮飯

我地見到老婆婆仲咁精靈, 我地都相信婆婆十年後一樣



我地由清快塘新村果邊上, 諗住行一轉就走返去深井村食午飯

婆婆又係唔專心行, 總係四處望

而神眼細媽就繼續四周探索, 每次都俾佢發現小動物或昆蟲等等

我本來想行泥路去青龍頭, 但婆婆怕突然落雨, 唔批准, 要照舊行車路呀, 唔係行山都係我話事咩

到喜香農莊, 見個天有D藍色o架...

大細媽好鍾意呢棵大樹, 可惜唔知品種

楓香路, 每次行都好舒服

土壤濕潤, 就見有捕繩草, 長出的小花真係好靚

金櫻子又開花....

春天萬花盛開, 何需去花展同人迫來睇人工花呢

又到大欖清快塘段(元荃古道C6112), 婆婆一樣唔批行泥路, 咪繼續上去, 行下車路轉多個大圈o羅....

有陽光o架, 但只係微風二級, 一路斜上, 全家都流汗, 為怕途中下雨, 全家改著行山涼鞋, 唔明佢地又著埋襪

果邊有聲呀.....

細媽叫我唔准八卦, 專心行

唔係喎, 另一方邊又有聲喎

細媽 : 都話唔准八, 專心行呀

知喇, 長氣細媽

婆婆, 行呢度上去田夫仔o丫
o下, 又唔批

我地繼續行車路, 未到 11點半, 突然灑了一陣雨....

細媽 : 避雨唔係去坑渠o架

雨點漸大粒, 全家開遮, 我仲可以頂住

地面仲乾爽....

途中, 我地又遇到一位行山伯伯, 佢原來跟山林行山隊由河背起步, 上甲龍徑來到麥徑, 但佢同隊尾相距都有一小時, 佢慣行山周圍欣賞風景又熟路, 選擇自己毛隊行程去深井, 原來伯伯已經 76 歲, 又係一位健康長者, 佢話行山係享受, 叫我地慢慢行, 我地收到 

到左 12 :15pm, 全地濕晒, 我四腳到裙邊都濕, 媽咪算左最多行三個鐘, 時間剛好

雖然唔係傾盆大雨, 但都唔細呀, 細媽話不如行車路去大欖, 但仲有好長遠路, 媽咪拍板, 接返元荃古道去清快塘, 因為係泥路, 細媽抱我行, 等我唔駛變泥鴨

雨令條路有點滑, 細媽抱我, 要步步為營....

細媽 : 我地好耐無行田清橋喇....

因為行呢段, 要急行兩百幾三百級石級, 所以好多人都改另一段路行, 唔行官方路....

細媽 : 終於停雨, 但濕泥地呀, 都係抱呢舊大石去到車路先算.....

行了廿分鐘, 回到車路, 原來話唔行呢度, 最後都逆行, 仲要我由乾身靚仔, 變了濕豬

原路折返, 乾地已變濕地.....

我亦越行越濕....

兩個半鐘前後的我, 相差好大, 我最怕濕, 每次落雨, 我就笑唔出....

好彩都搏到三個鐘好天, 其餘時間一係抱, 一係濕身行, 算係咁...

落返深井, 遠方濃霧, 令山與山灰度層次分明.....

咦, 又開始雨點越來越大, 細媽見我都行左咁耐, 唔想我濕透全身, 抱埋我行埋餘下少少路....

雲海在高山, 未來一星期, 天氣都會係咁, 仲可能日日雨, 究竟復活節有無運行, 定四日都呆在家呢