130323婆婆重出江湖之東澳古道逆行

婆婆短休兩星期, 今日重出江湖, 為免佢停了一段時間無練腳力, 我地揀條簡單而又有點點長的東澳古道來作婆婆出山之行



我地都係慣由大澳起步, 免去回程在大澳打人龍蛇餅

今日預告 22 -28 度, 間中有陽光, 相信唔辛苦

美麗青綠山色, 又重現婆婆眼前, 大細媽一路行, 一路聽到婆婆殿後呱呱叫話好靚, 都唔知應開心定係煩

婆婆, 靚還靚, 都唔好停定係度睇, 否則天黑都返唔到屋企

上年12月29日, 我地行到沙螺灣就落滂沱大雨, 今日應該唔會又咁邪卦

遠遠的雲, 有兩層分界, 下層與海連成一線

今日全家齊晒四口組, 一路行, 三位女子一齊鬥咀, 都幾嘈o架, 但又好開心o羅

媽咪話我今日, 由落地開始, 就滿面笑容

僅係啦, 一來等左 6 日先有山行, 二來婆婆又眼仔好返, 精神奕奕, 又繼續陪地我地周圍留腳毛

輕輕鬆鬆又到深屈灣....

細媽見有個牌去茜草灣, 問下媽咪係去邊, 有無野睇,媽咪話可以過村去睇粉紅石, 但要行出岸邊同攀爬, 唔適合我同婆婆

10:45am咋, 當然唔會留在此處食早午餐啦

繼續向深石村前進

婆婆, 慢慢上斜, 我地唔會急, 但你都唔好停低唔行喎

路過沙螺灣, 今次無落雨, 但有狗吠聲, 細媽知我怕, 抱我過晒村先自己行返

香港常見的龍眼雞, 我地行山都成日見, 婆婆今日當新發現, 鬼咩, 佢以前可能都睇唔清

婆婆, 放心, 只要你乖乖聽大細媽話, 保持身體健康, 以前錯過的美景, 我地會重複再去過, 咁你想唔想又再重新挑戰香港三高

細媽 : 做乜突然咁嗲嗲

我好嗲咩

呢段苦路, 令我想起細媽愛的抱抱兩小時, 謝謝細媽


咁近機場, 表示路程行了一大半

又入(石散)頭村, 少不免又抱抱

呢度有廁所, 大人當然要方便下先

點知去完廁所出來, 細媽見水道淺水位有十條左右小蝌蚪, 細媽怕佢地會被陽光曬死, 於是捉返落一個深水位, 點知捉完以為完工, 望下右邊, 差不多成千條小蝌蚪分佈三個唔夠 1 cm 的砂地, 雖然話明天可能落雨, 但都唔知佢地等唔等到雨水來, 於是兩位女子又埋首, 救得幾多得幾多, 救唔晒, 都無奈


佢地用葉小心翼翼捉....

有些又細又埋在砂石中, 惟有慢慢來....


經過半小時, 基本將所有蝌蚪搬去離開6 呎的小水池....

雖然呢個位得 2 吋水位, 總好比快乾涸的地方好卦, 希望無遺留啦
呢三位女子就係咁, 唔係插秧就救亡, 點可能會行得快呢

媽咪都幾鍾意影花, 又奇係野花, 可惜 J1 加 10-30鏡所限, 好難影大頭花, 但同一花朵, 主角位在不同位, 拉近拉遠都有不同效果, 媽咪話靚唔靚, 只要在自己心中就夠, 因為已經記錄在腦海

見吊車, 快到市區

已經下午, 陽光出來了....

兩點多, 天色又暗了...

現在水退, 東涌戶外康樂營對出的紅樹林位, 我地無行過, 走出來望望, 見有人望蜆, 有人拍拖, 仲有外景隊來拍攝, 證明景色唔錯....

婆婆行左十幾公里, 仍然精神爽利, 眼睛碌碌

婆婆, 我地鬥大眼啦


如果唔係佢地花左半小時救亡, 我地可以快半小時行畢全程, 扣了半小時, 今日連埋休息同飲水共花 5.5 小時, 保持龜速 HEA HEA 記錄, 但內裡包含好多歡樂, 匆匆而過, 會錯過好多野o架