130309梧桐寨村上四方山, 下鉛礦坳碗窰

今星期, 婆婆休戰的日子, 媽咪想試下挑戰另一條新線
本來想坐車直上到大帽山600多米高的停車場起步行去鉛礦坳, 但似乎無乜意思, 一於由海拔100米多的梧桐寨村, 直上700多米的四方山, 再落鉛礦坳同碗窰

我當然要過晒村屋先可以落地啦, 剛才大狗吠聲, 我仍未回魂

沿萬德徑上到萬德苑旁的梧桔寨瀑布入口...

媽咪話今次唔上瀑布群....

係在入口轉右邊山徑直上四方山

呢個牌係指到麥理浩徑M144的四方山涼亭的長度咋, 並非到大帽山山頂


媽咪知呢條山徑, 係漫長又企又高的石級, 如果婆婆行, 一定好辛苦, 所以我地要先試路

三月係杜鵑花盛放季節, 呢帶都唔算多, 但途中都見一棵好大好漂亮的紅杜鵑呀 

唔止花, 仲有不同紅橙黃色的嫩芽

不停高大石級上, 加上今日高氣溫, 媽咪行到氣喘, 平時佢都好少咁大氣喘聲, 無左婆婆, 變左媽咪行包尾

金銀橋同大刀刃變得很渺小....

我暫時都無問題


因為坡度好大, 上山石級路要成"之"字型來減低坡度, 樹太密, 影唔到效果, 但每級都好高, 我要不停跳上...

上了一大段路, 好彩間中都有平緩石級位....

不經不覺, 上了很多, 路越見平緩了....

終於來到呢個位, 上次行完瀑布群, 就由此上大帽山

最艱辛的路行畢, 在此休息一陣, 又要應付上山路, 因為上次行過, 知道簡單多

仲有 1.5 公里咋

Go Go Go  

呢段開始開揚, 更能感受春天氣息


一路都係紅葉, 我地一路邊行, 邊欣賞, 邊影相

行山唔需要急, 又唔駛趕....

事關一閃而過, 會錯過很多大自然美麗事.....

停一停, 望一望....

在滿山美景下漫步行.....

深深吸一口清新空氣....

望望養眼綠色, 對眼睛好D....


身體都健康D

來到四方山涼亭

遠遠的大帽山都行過.....

今日要試未行過的另一段, 落鉛礦坳要行 3.5 公里, 好新鮮感覺

媽咪都唔記得自己以前有無行過呢段, 因為佢以前只係跟住行, 去左邊佢都唔知
佢恨左想行好耐, 但帶埋婆婆, 又驚路程長, 石級高, 婆婆一定好辛苦, 所以我地試一次, 再衡量婆婆可否應付

據聞大帽山一帶都有種茶, 細媽發現前方位係一級一級石頭堆砌而成, 似係茶園遺跡

要在亂石群中走.....

由今日最高點(784米)回望大帽山大波波, 我地會唔會又再上呢

我地會在山脊行兩公里輕鬆路

呢段好開揚, 媽咪一早叫細媽帶定唧唧樽, 沿途幫我噴身降溫, 鬼叫今日似夏天咁有成 27 度咩

呢帶好多大石....

細媽仲發現呢舊大石頭.....

企高影, 好有氣勢呀

仲有咁長路, 好似行極都無完咁o既

大細媽又發現, 好多大石都有呢D大圓孔, 究竟變形成呢, 何解全塊石, 係得呢個位D石質唔同, 等對石頭好宥興趣的媽咪搵下資料先

慢慢下坡了, 遠遠係草山, 針山入唔到鏡內, 但諗返起, 其實行針山同草山真係易好多, 事關上針山, 起步已經係 200 多米 

一落下坡位, 大細媽又嘩嘩聲, 太靚啦

再落少少就入樹蔭下, 遠遠係草山

呢段唔曬, 舒服好多

有分岔路去川龍 7 公里, 需時 3 小時, 有新線可揀啦

其實由頂行落來, 坡度唔大, 一D唔難, 只係要去起步點即鉛礦坳就煩D

見到第七段同第八段交接牌坊喇

終於俾媽咪一嘗心願, 佢初初以為會非途又抽筋, 都有拎埋行山杖來, 但一直都唔駛用, 白拎添

到鉛礦坳, 一係行 5 公里去城門水塘, 一係行 5 公里洳去大埔滘, 一係行3 公里多去碗窰 

媽咪好想去碗窰睇下, 我同細媽當然無異議

去碗窰係沿衛奕信第七段行....

起步位, 有個野餐區, 其中一張石檯係凹入, 好奇特

經過由 100米上 784米, 再落回400多米的鉛礦坳, 又上又落咁多大石級, 我開始有疲態

細媽話我已經係 8 歲中佬, 都行左快 5 個鐘, 唔似以前細過咁好力氣, 所以抱我行一小段, 等我休息下

我休息左幾分鐘, 覺得自己都應付到, 決定自己繼續行程

我地幾年前一併行針草鉛後, 都係揀由碗窰走, 果次因為係山火後, 全家行到鞋底黑晒, 我四隻手腳都成黑炭色

見到大埔市中心喇.....

到元墩下車路, 細媽怕有車, 要我結束行程.....

由我私人司機載我行埋剩餘路程

原本可以坐小巴出市中心, 但媽咪想參觀碗窰, 反正時間尚早, 還佢心願啦

佢以為可以睇晒所有遺跡, 原來分佈好廣闊, 有些碗窰遺跡已顯沒草叢或蕉林, 有些要行沿衛徑第八段, 行 2-3 公里先見, 都係睇下呢個碾磨作坊就算....

好攰呀, 返屋企喇, 婆婆等緊我地返去一齊食米線o架
我地最後行去運頭塘村坐車去匯合婆婆

今日行程都約 13 公里, 最辛苦係梧桐寨村上, 但可以在晴朗天下見美景, 係值得呢