080727皇瑟堡成立兩週年暨第三屆水運會

今日係我地皇瑟堡成立兩週年暨第三屆水運會呀, 我地今年揀係Pet Oasis (寵物綠洲), 成67人57狗, 順道同為5-7 月份o既壽星仔/女補祝或預祝生辰添呀

我因為怕左在泳池游水, 本來細媽都唔想來, 但最後媽咪求左好多次, 我先有份出席咋

我今日來為其他小朋友吶喊打氣

新成員 - 入伙之喜

今日收工, 我同細媽專誠跑到旺角, 買一個新大籠俾我家新成員, 新屋比又舊又殘的大好多, 佢可以展翼舒活筋骨喇

最重要, 都要同佢起返個名, 細媽話佢從未叫過一聲, 又傻頭傻腦, 懵盛盛咁,

就叫"黃盛盛"喇

盛盛, 我地猜你可能由高處跌傻嚇親而唔識叫, 仲有我又發現你右翼部份位, 似乎有折斷現象, 可能仲有痛, 你不敢張開翅膀學飛, 相信當日跌落地時, 真係好傷呀

放心, 我地唔會厭棄你, 但我地一樣會愛鍚你, 照顧你一世o架

增肥之路之流浮山海鮮團

明知第二日要返工, 本來一早話唔想太夜回家, 但魔鬼之誘惑真係好難擋

今日又摸黑入去流浮山食海鮮喇, 到呢間海鮮酒家都成8點45分喇

想食海鮮, 最好就係自己揀, 想食嘜點嘜

又多一員 ^^

21/6帶回家的一隻小斑鳩, 已經大了好多, 係時候放佢回大自然了

20/7星期日早上, 我地見天氣晴朗, 就帶佢去最初發現佢的地方, 放佢在花槽時, 見佢一柺一柺行, 傻更更咁, 我即時捉起佢看看

Oh, My God, 原來佢右腳中指第一節連趾甲一早斷了, 應該係當初由樹巢趺下來時折斷了, 我地一直都無為意, 真是可憐蟲呀

斷了趾甲即不能抓緊樹枝, 又可能好快成麻鷹獵物, 即是屎路一條呀

轉一轉腦, 我地拍板即時決定照顧佢一生一世呀

小BB, 或者可能你會覺沒自由, 但我地唔想你白白命送呀

稍後細媽有空檔, 就會買個新大籠, 唔駛小BB你屈得咁辛苦喇

希望呢個決定, 唔係一個大錯啦

攝於19/7 ^^

080720炎夏好地方

炎炎夏日, 又唔可能個個星期日去游水, 行山又怕中暑喎, 加上昨晚又夜返屋企, 我一早起身想左好耐, 都係叫媽咪近近地, 去西貢獅子會跑下好過

080719天涯海角

今日水池姐姐帶我地一班大人同小朋友去佢家鄉 - 坪洲, 好彩細媽趕及收工一齊來玩呀

糖痴豆定水溝油

起初養洛洛原因, 都希望婆婆都家有伴

可能我地唔識教導, 加上洛洛本身性格都好崛強唔認輸, 天生敏感警戒心強, 自我主張強烈的特性, 真係比較不易訓練。再加上細時, 婆婆用過籐條對付佢, 當佢同婆婆獨處時, 我地知係唔會有事發生。但我地在家時, 洛洛好似有我地做靠山咁, 由其是有野食時, 成日唔俾婆婆埋身, 又吠佢, 又時仲出口添呀, 一係又偷婆婆拖鞋, 搞到婆婆呱呱叫

但有時, 佢兩婆孫又糖痴豆咁, 成日一齊玩波波, 婆婆仲玩到興高采烈

呢D真係叫一啖砂糖一啖屎呀

080716皇瑟堡(RYC)兩週年

霎眼間又兩年了

想當初因想養隻小狗陪媽咪，等佢唔駛整天單獨在家，我地閒時又可以一齊帶小狗出外郊遊，千挑萬選，誤打誤撞搵到一種小型品種 - 約瑟爹利犬，以致加入某個狗種討論區, 繼而認識一班有同樣愛約瑟的網友。

又因該討論區突然暫停操作，令大家失去一個溝通平台，反正該討論區活動又唔多，唔想受版主管束，幾個柴娃娃兵就夾份成位一個屬於自己的天地 / 堡壘  

2006年7月16日星期日

皇瑟堡 (Royal Yorkshire Club，簡稱 : RYC) 出世了 

我唔識電腦，唔識設計，學歷唔高，養狗知識疲乏及經驗不足，只可負責活動籌劃工作。

想當初，好希望快快多點人認識"皇瑟堡" ，我地又登記 Yahoo，又投稿去寵物雜誌，我仲私下登埋 88DB添，務求以不同渠道增加宣傳，今天，漸漸有點兒成果。

呢兩年來，營營役役地去學習怎樣去搞好活動。過程中，我認識到的人比我前半生更多，各行各業，各式各樣的人，也遇到有誤解及分歧的。

處女座的我 - 有點挑剔又追求完美的星座。缺乏信心的個性，常在潛意識裡責怪自己不夠美好；雖然難免會使心情沉重，但天生的優點就是放得開，不會就此一蹶不振。

星座性格使我令其他人受無形壓力，在此希望大家原諒我呀。

雖然相遇未必成相交，但我希望皇瑟堡一路延續一個開心平台，等所有愛犬之友共同分享養犬樂趣。

有興趣可以登入以下網址 : www.ryc.in

60日後怪獸會

無賴怪獸個個星期都飛去外星漫遊, 頭尾剛好60日, 都係用衛星通訊聯繫, 今日, 佢提早左在黃昏時, 由外星返回地球, 咁我就帶佢去怪獸壽司食返個地球餐啦

080713雨天漫步往旺角 (Video 篇)

我行到九龍塘有蓋天橋, 因為落雨, 被迫停留等雨停, 我當然唔放過條好跑道, 我來也

080713雨天漫步往旺角

星期六, 我已經呆在家發霉, 幾驚星期日又係一早滂沱大雨呀

一早起身, 地下雖然濕透, 又下著微線細雨, 好彩天公體諒, 稍停雨喎, 咁我又可以同媽咪去街街食早餐

坐坐下, 出太陽, 冬菇亭叔叔打開太陽傘俾我地遮猛烈陽光, 我曬到好熱, 偷飲細媽杯涷檸水先