170812婆婆又腳腫

細媽昨日同媽咪講,婆婆話左腳痛, 細媽叫佢唔好走左去睇中醫, 怕同食緊的西藥相沖, 婆婆話小腿肌肉扯痛, 想睇跌打. 媽咪夜晚返學返來, 一望婆婆雙腳又腫左, 好嚴厲唔俾婆婆睇跌打.

都成 11 點, 嘗試打去預約星期六廣華門診, 預左無位爆滿, 點知可以轉試同區九龍中門診, 竟然10:15am仲有一個位, 當然照要啦.

其實媽咪知乜事, 知婆婆講極唔聽, 埋怨大細媽, 唔想婆婆唔識亂咁睇跌打, 由醫生睇左解釋, 婆婆先會相信.

第一次來九龍中門診, 又似劉姥姥, 乜都傻傻下, 量血壓同心跳係自助形式, 量好後, 交紀錄俾護士入資料.

血壓 : 118/70, 心跳: 85 , 好正常.

最後, 都係等到 11:00.

醫生話主要係靜脈曲張引致腳腫, 情況唔嚴重, 只要唔好企太耐, 輕量適當運動下, 休息時, 將腳抬高平放, 著壓力襪, 搽特效按摩膏, 腳腫情況會改善. 真係覺肌肉扯得痛, 可以食止痛藥. 千祈唔好亂睇跌打, 會好易捽傷血管, 咁就大件事. 媽咪叮囑婆婆, 要聽實醫生講乜. 醫生話下次專科, 可以要求轉介去睇專科同做手術.

媽咪去拎藥, 嚇左一跳, 駛唔駛咁大包. 同婆婆講, 真係好痛, 頂唔住, 先好食, 始終食得多止痛藥, 都係唔好呀.

離開診所, 慢步去窩打老道, 近廣華醫院附近, 買左對大碼壓力襪試著, 明明量左尺碼, 點解咁難著上, 唔通要再買加大碼 ???