130810荃錦坳縱走落川龍

踏入 8 月初, 就係婆婆生日月, 今年頭炮由肥舅父一家陪婆婆首航, 我都唔執輸, 安排婆婆第二輪活動



媽咪唔想又係行城門河畔, 又帶婆婆食大牌檔, 於是諗到來大帽山郊野公園行下

未夠 8:30 am 就到, 今日天氣酷熱, 唔上山頂喇, 怕無樹蔭, 高山上, 紫外線更高, 會曬傻o架

荃錦坳扶輪公園內有幾條家樂徑同自然教育徑, 雖然在夏季, 但在樹蔭下, 唔會辛苦同中暑

首先在小食亭旁入扶輪營地

先行大帽山家樂徑, 得550米, 繞公園一周

樹底下, 輕輕鬆鬆

夏天蚊蟲比較多, 要做足防蚊同防曬呀

我記得我仲好細時, 第一次來係大姨媽帶我地周圍行, 對上次來就係09年11月29日, 約了好多朋友仔來燒烤, 轉眼又 4 年

今早未出門時, 細媽話天氣預報, 中午會有驟雨, 佢話可能落在我地頭頂, 但我只見呢度煙霞多咋, 有無咁易俾佢開口中

陽光幾好, 但可能我地身處差不多海拔 600米, 望大帽山山頂都有厚雲遮掩 

行完家樂徑, 我地再行大帽山遠足研習徑, 全長一公里, 要上山落山, 但都唔難

徑中設有一個古代測時儀器日晷, 我唔識睇喎

當攰時, 大家學我, 在蔭下休息下

途中經過一條小溪流, 我忍唔住落去濕下腳

溪水清澈, 仲見仍有尾巴的小青蛙...


同淡水小龍蝦, 睇到班女子唔願走

唔走唔得o架, 企耐左, 餵蚊o架

到分岔路, 睇定想行邊度

開始上山, 慢慢行, 唔駛急先係上山正確態度

沿途有好多傳意站, 教導大家遠足基本知識及技巧...

見到就行埋去望望喇

細媽 : 黃家洛, 我真係好難阻你唔掘泥

媽咪懶, 唔同我剪指甲, 我咪自助搞拈o羅, 又係我至愛活動

有上跟住僅係又落

唔好唔留意地下, 有大腳板教落斜姿態

兜完研習徑一圈 

最初計劃, 行完家樂徑同研習徑就落川龍, 但飲下水, 休息下, 都未夠 10 點, 一於 

行過去荃錦公路另一邊, 行埋荃錦自然教育徑

全徑長兩公里, 慢行約需一個鐘多點咋 

又係樹蔭穿梭, 炎夏都唔驚

呢度有條牛寮均衡定向徑, 我地今日都見有兩組少年來學習野外定向, 大姨媽一家成日來做練習

入直昇機坪喇, 我雖然成日行麥徑, 都好少再專登行入來

時間仲早, 決定行晒全段

今日都算熱, 媽咪婆婆不停流汗, 但望上天, 除左樹葉, 就常見厚雲, 陽光都係間中在雲層偷偷出來照耀下

今日幾段徑都有觀景台, 山下濛濛地, 但都見荃灣一帶...

有個分岔位可以行去白石橋或川龍, 好耐以前, 大姨媽帶我地經呢段落川龍, 但會經過一些村屋, 好多惡村狗, 我地唔敢行

Hea Hea 下都未夠 11點半

我地拖長行, 時間剛剛好

又過馬路去扶輪公園先

我地今日選擇由扶輪公園自然教育徑落川龍村飲茶

上次由新開田行上來霸燒烤爐, 今次就行落去

全徑只有 0.8 公里咋...

主要落石級...

好快到終點

等埋婆婆....

細媽就抱我沿馬路邊行人路行去川龍村

最初打算去端記, 經過彩龍茶樓, 其實我地以前都來過幾次, 總覺食物好似端記好, 但媽咪聽到店內姐姐話樓上有冷氣雅座, 全身汗的媽咪問下姐姐, D姐姐話當然得, 大細狗都無問題, 今早仲有兩隻雪橇犬上去嘆茶

剛坐低, 頭頂轟轟行雷聲, 接著傾盆大雨, 我地好好彩

安排今日行程, 主要帶婆婆來嘆茶, 你地睇, 婆婆在冷氣雅座食得幾開心

唔好以為檯上得幾碟, 已經係第二輪, 第一輪的碟已經拎走
今日味道比以往好味好多, 佢地不停係咁拎點心來食

我行左半日, 飲完雞湯, 都要爭敢時間休息, 免得聽日唔夠精神
當到收銀台俾錢時, 收銀姐姐好驚訝, 原來三位女子一共食左 13 款點心, 有菜有糯米雞有炸鯪魚球, 唔係碟碟細野, 一共食左 $286
呢三位大食女子食力嚇親人呀