100723勇攻富士山頂 - 登山篇

一早起身, 收拾行裝, 食埋早餐, 就徒步往富士急行新宿站 - 新宿駅西口BT 我地搭便名(車號) : 1405, 9:40am開, 12:05pm 預抵五合目。

終於到了富士山五合目(2305m)

未出發時, 我地上網搵, 都話五合目無地方寄存行李, 一係預早寄存在山下酒店或旅館, 我地由新宿直達上來, 無可能中途在河口湖放低部份行李, 惟有見步行步, 最壞打算係全個背囊揹足全程, 我唔敢想像捱唔捱到, 我背囊成 8 公斤有多

好彩俾我地發現, 其實五合目有好多付費行李保管箱, 收費按大小計, 我地除了食水/ 禦寒衣/證件/錢/藥物等等外, 其餘登山不必要的物品都寄存好, 存在大櫃, 用了 400日元

為怕有高山反應, 我地必須在五合目停留個半鐘來適應, 而且都中午了, 我地在其中一個食店, 享受登山前的一餐美食, 事關在山上, 唔好預有人間美食呀  

仲有, 原來室內都有好多行李保管箱, 費用一樣, 笨左添

食飽飽, 仲係早, 我地周圍行下, 等適應下就出發登山.....

想懶, 有人會騎馬行一小段.....

心理同生理準備好, 1:30pm, 出發登上富士山頂, 我地目標係入黑前, 即盡量在今晚 7 點前抵山小屋 : 御来光館では富士山八合五勺（標高3,450ｍ）   

我地選擇路線係由河口湖嘴五接合處 (吉田道路)起步, 亦是最多人選擇的路徑, 標誌的顏色︰ 黃色步行, 全程距離 15.1 km (登山︰7.5km 下山︰7.6km)

原來今早有一年一度登富士山頂比賽, 路程有長短, 我地問過一些完成比賽參賽者, 最遠係鬥快抵山頂來回, 即我地今次預定路線

見到地面情況嗎 ?

由五合目起步, 頭段比較平坦, 但全段路都係咁o架, 主要碎石, 步行時都難發力, 易跣, 都幾吃力, 唔好輕心....                

步入登山道, 仲有參賽者跑緊落來.....

每年開山季節, 好多日本人都會登山, 佢地認為一生人至於登上富士山頂一次才算無撼, 所以每年吸引好多日本人, 有老有幼, 車路塞車, 山路塞人, 但日本人好有秩序, 排成一行靠右行上山, 途中真係唔怕會入無人境界

為鍛鍊國民, 學校都組隊帶領小學生登山, 老嫩都行到, 我一定要成功攻頂......

為防有山石滾下, 間中都會見呢D建築物....

抵六合目安全指揮中心, 回程下山都會再經過的.

回程在吉田口返來, 由此上山頂係 320分鐘.....

開始綿綿不斷的砂走登山路.....

因為碎石多, 已經圍上木板級, 唔算太難...

怕跣的話, 最好拿出行山杖, 我就仲未拎出來

登山路, 一片片厚雲浮來, 時陰時晴....

開始見一些山小屋.....

砂路完了, 開始攀山, 要手腳並用爬.....

七合目花小屋, 有行山杖出售, 比五合見貴好多, 仲可以俾 200日元燒印, 但拎住支行山杖仲難行, 回港寄艙又煩, 返屋企又阻地方, 都係慳返

登山路窄, 又塞人了.....

日出館.....又燒錢                        

回望山下....       

好塞人, 我同家姐惟有有位涉位, 否則驚入黑都上唔到御来光館.....

鳥居莊 2900m  

我以前試過在尼泊爾行山出現了輕微高山反應, 要慢慢行以防高山反應出現, 行下抬高望下美景, 都幾開心....

幸好有鐵鍊借力, 因為一路爬上高石級, 雙腳開始酸軟了...

太子館 3100m                                 

感覺溫度低左好多, 遠望山上白雪未融化, 證明了....

好難辛先又上了 50m, 蓬萊館 3150m, 仲有 300m

蓬萊龜岩 - 八大龍神.......岩石 ? 邊舊呀 ?

攀上高海拔行山, 氧氣比較少, 幸好我不嬲習慣呼吸較慢, 唔急速, 相信較易慢慢適應.....

半途吹到流鼻水, 要著返件風衣.....

3200m 白雲莊   

3250m 元祖室雙腿好攰, 好攰.....

我太慢了, 家姐要就我慢步伐好辛苦, 而且得一條路, 佢話在御来光館等我....

平時行山, 果百幾米高都唔覺太高, 今日行上幾十米都花好耐時間.....

仲有 50m , 加油......

6:30pm, 日落了....

月亮出來了, 感覺好正......

未夠 7 點, 終於到達今日目的地........

雖然又凍又攰, 但咁大個女, 在3450m 望夕陽下山, 正確係沒入雲海, 仲有月亮陪伴, 好靚呀

家姐好早計劃自己獨自登山, 一係由成田落機, 就直攻上富士山頂, 唔會入住任何旅館; 一係找其中一間山小屋中途休息, 再半夜攻頂, 以佢體能, 當然綽綽有餘

但有我跟埋, 先係咁行程安排.....

當我地落實機位, 家姐上網訂八合目以上的山小屋, 竟然全爆滿, 咁咪要在高山冒寒

好彩我地心意的御来光館, 突然有空位, 因為唔駛預付訂金, 相信係旅行隊一早霸定位, 唔成團後, 將位放返出來, 我地真夠運

我地訂的係１泊２食付（夕食・朝食）, 8,500円, 都幾貴o架, 夕食只係簡單一個牛肉漢堡便當, 但在山上可以有熱食, 我都好心滿意足

旅館由木板搭建, 都幾穩固又擋風, 旅館提供鞋袋, 入內要除鞋.

唔好預有高床軟枕, 我可以用停屍間來形容, 館內左邊為寢室, 分上下一格一格, 男女分格, 我地分配在上格, 背囊同鞋袋就掛在腳上的掛鉤, 容身位置剛好足夠容 4具屍首

初初以為我地果格容 3具屍o者, 好彩我地早上床, 原來竟然一張棉被由 4個女仔享用, 肩並肩貼實, 想轉身都幾難

我瞓在中央, 全晚拉實張被子, 怕俾另兩具屍首搶被子, 凍親家姐 

8 點上床就寢, 事關半夜 12點要起身攻頂啦

輾轉反側, 都瞓唔到, 10點多, 又覺有急意, 惟有爬起來, 摸黑走出館外洗手間, 原本廳中央都鋪滿塌塌米, 瞓滿晒人了....

在黑夜, 仍見好多人, 戴著頭燈, 摸黑上山.............

仲有好煩惱事係........竟然發覺提早一星期來 M, D包包留晒在五合目保管箱, 有無搞錯呀

好彩旅館又幾體貼, 廁所有包包提供, 惟有做貪心賊仔一次, 拎多幾包防身啦

御来光館網址 : http://www.goraikoukan.jp/

按此往”100724勇攻富士山頂 - 攻頂、賞日出篇”