181223盛之一族

今日返來, 見露台晾衣架有兩團黑色物, 望清楚, 原來, 係盛盛一族又來.

外邊仍毛毛雨, 仲有風, 盛盛朋友就咁企係晾衣架.

佢地應係成日上來同盛盛傾歇的其中兩隻盛家族.

因為有少少風, 睇見都有少少牙煙.

怕佢地跣親失平衡.

好怪, 今日無一齊唱歌.

盛盛都好安靜.

昨日傾開, 我地在 2008年 6 月 21日在樓下發現初生盛盛BB, 不經不覺已 10 年幾.

盛盛比外面的細身, 可能係無媽咪餵食同教飛行, 佢又習慣左在此生活.

試過好多次, 籠門開住成日, 佢都唔會自己離開個籠.

或者, 朋友仔同佢講在外生活難, 又唔識搵食啦.

佢地最後都企左成接近三個鐘先走, 得閒又上來同盛盛聊天呀.