100124婆婆失蹤記

媽咪約左毛毛同Pee Pee今日行山, 但 Pee Pee 臨時有事, 唔可以來, 但我地同毛毛仍按原計劃在銅鑼灣集合......

我地坐車由家出發, 婆婆走上樓上位唔方便, 通常一定在樓下坐, 而我同大細媽就走上樓上會方便D

過紅隧後, 因為好快會落車, 媽咪一早吩咐婆婆唔好坐太入邊, 怕佢落車時論盡, 又同婆婆講左, 過隧道後好快落.......

點知................

當我地過隧道後預第二個站落車, 準備落樓下叫婆婆時, 竟然失去了婆婆蹤影, 車內一位婆婆問是否一位著灰色褸揹黑色背囊的婆婆, 佢見位婆婆一過隧道就落車, 仲落車後左望右望.......

原來又玩失蹝記, 已經唔係第一次, 有一次坐車回家, 佢自己傻傻下聽到有人叫落車, 就早了兩個站落車, 好彩係龍翔道, 又在屋企附近, 起碼識行返屋企, 而另一次就在西貢, 佢自己去廁所, 我地在原位 shopping 無走開, 佢回來竟然話搵唔到我地, 仲周圍走, 最後自己坐小巴回家....

唉, 婆婆又唔熟識香港呢邊地方, 我地已經落車即時走去第一個車站, 唔見佢企定定等我地       

我地同毛毛在鵝頸橋同銅鑼灣一帶, 搵左個幾鐘, 都唔見到婆婆, 佢又無電話在身邊, 點算好呀                                    

我地個個都好擔心, 但報警又太早, 媽咪按以往經驗, 估計婆婆識自己問人路, 然後坐車回家, 而且毛毛兩母女又山長水遠來到, 又幫我地搵婆婆, 要佢地無癮回家又唔太好.....              

於是照原定行程往陽明山莊, 另外一路打電話回家, 見步行步....

當我地到陽明山莊大潭郊野公園, 終於收到婆婆由家中打來電話報到

原來佢落車發現我地仍未落, 想上返車時, 車門已經關上, 佢即刻朝巴士方面追, 想行去下個站搵我地, 可惜搵唔到站又迷路, 又搵唔到車站坐巴士回家, 於是走去坐的士....

好彩我地成日哦佢要隨身帶定百幾蚊, 就算走失都有錢坐的士回家呀.....

婆婆回家, 大家心都定返, 正式開始今日行程 - 東區自然步道

無左婆婆 , 雖然有毛毛同 Jenny 姐姐陪, 但我心情仲未平緩返...... 

搞左成朝, 肚仔餓, 早點開餐, 本來預了 5個大人份量, o依家得返 3 個大人, 唔拎晒D 蛋糕出來, 留返 D 回家俾婆婆食

家中仍有一盒桂花馬蹄糕, 3 個大人享用晒呢盒

我地來得太多, 今次毛毛第一次來, 當然要影多 D相.....

我地好專心行山, 加上無婆婆, 步伐快了, 好快到大風坳.....

毛毛怕其他狗地, 我惟有相就企高, 先可以來合照....

柏架山附近都有吊鐘花開, 係時候去西貢賞花....

毛毛, 我做佈景板陪你

好快落回市區.......                      

我地食埋下午茶餐就各自回家.....

婆婆今日又迷途, 又無山行, 又無野食, 我地要買外賣俾佢安撫佢呀

回到家中, 細問婆婆下, 架車轉右, 但佢轉左, 我地肯定搵唔到佢, 好彩佢口袋有 $120, 而回家的士費只需$98, 仲有餘錢買 TBB周刊, 上車時又同司機講自己落錯車, 唔見左D 女, 一路上同司機好好傾, 我地回家後, 婆婆滔滔不絕講同人家傾歇內容, 真係俾佢激屎

事後檢討 : 細媽決定以後上車前, 再三叮囑婆婆, 必須見我地先好落車, 落錯車一定要企定定, 唔準行開, 我地一定去搵返佢；而媽咪決定買部簡單手提電話, 教識婆婆接 / 收來電同簡易撥, 每次行山出街跟身, 希望唔好再出現"婆婆又失蹤記"