200202何解腳拐拐

昨晚, 我行路, 後腳拐拐吊起, 大細媽以為我跳上跳落或早上行城門河時整到.

後來, 媽咪掂我左後腳, 我腳縮起覺痛, 先發現在大肉球旁, 長左一大粒肉粒, 好紅好腫, 

怪不得咁痛啦, 都咁夜了, 惟有睇下下步可以點.

大細媽都以為係之前生出來的肉粒, 但呢個位置做手術都幾煩呀, 而且又要麻醉.

今日起身, 媽咪準備幫我梳毛, 放我在櫃上時, 發現有血水在毛巾上, 馬上叫細媽, 一齊睇清楚, 原來唔係肉粒, 係生左粒大瘡, 今日爆左, 流血水.

媽咪立刻拎火酒同棉球幫我消毒, 原來仲有膿, 仲有黃白色硬膿呀. 

媽咪叫細媽抱緊我, 佢幫我放膿, 盡量把膿水除清, 同馬上消毒.

用紗布包紮好, 著埋襪仔.

媽咪話不幸中之大幸係唔係大肉粒, 而係大瘡, 希望唔發炎, 快快埋口啦.
所以, 今早無落地行, 只係落地放完大小兩便就上返車.