171126周日洛行

今日仲未可以遠行, 都係來城門河 hea 行.

171125開心拆線日

 除瘤後, 一直等今日.
我地約左 10點返診所拆線, 好心急, 9 : 30 已經到, 就係想拎頭籌, 點知要 10 點可以登記, 診所姐姐都話我地心急.
上磅 5.8 kgs, 因為剛剛放低有成 100 g 便便.
今日由吳醫生負責拆線, 佢話埋口好好, 因為拆線後有小傷口, 呢幾日都唔可以濕水.
拆完線即走, 出門即有的士, 直接入來大圍.
細媽先醒起, 忘了在診所影相做記錄, 記錄下我一到診所門就變震震狗.

暫時呢兩日都係行下城門河先.

171119不能停的輕步行

除瘤後, 今日係第四次出外.

昨晚有雨, 大細媽半夜都留意雨停未, 地乾未.

因為地濕勉強出來, 就算大人可以活動, 但我又唔可以落地行, 我會好唔開心. 所以都唔會出街.

171118輕鬆朝步在城河

今日係除瘤後一星期, 又係去城門河行下, 大細媽想我舒服些, 嘗試唔幫我帶頭罩, 頭罩就袋住做後備, 但佢地唔記得拎膠鞋囉.

171112除瘤後第二日

天文台話有雨呀, 本來預左濕地就唔出來, 起身仲係算好天, 嗱嗱臨來到大圍.

171111除瘤後

昨日除瘤後, 正常都要在家休息.

但醫生吩咐, 婆婆要多做運動, 所以都要每周帶婆婆出來行下.

大細媽都好矛盾, 但衡量後, 都係唔可以唔郁, 最多抱住我行.

今日坐的士到大圍馬鐵站起步.

171110除瘤記二

25/10續牌仔時, 醫生姐姐都講過, 手趾肉粒同頭頂魚蛋, 基本上, 我唔搞, 可以唔做任何野.

但11月初, 我覺得手趾肉瘤唔太舒服, 又係成日用脷仔搞到粒瘤仔又紅又損, 皮仲變黑左又甩埋流血. 

上次係今年 13/2 除瘤, 大細媽本來唔想我咁短期又全身麻醉, 但著左襪仔都係頂唔到成世.

上星期日, 商議後, 媽咪拍板幫我再做小手術. 佢話好過每日提心吊膽, 肉瘤發炎, 令血液有毒素. 壞打算係再全身麻醉後, 我會蠢D喎, 我又唔駛返學, 唔緊要啦. 因為驗血無耐, 可以直接約手術期, 最後, 約左今早由細媽帶我去診所.

在家磅重係 5.8 kgs, 診所又係同磅數, 即係診所個磅無錯.

醫生姐姐檢查過, 話反正做開手術, 可以連魚蛋一併割除. 因為手趾肉瘤長得快, 可以考慮化驗係良性定惡性, 魚蛋就似老狗水瘤, 可以唔驗. 大細媽商量後, 決定按醫生提議, 其實大細媽都諗過, 一次除埋魚蛋, 只係擔心我變地中海.

清醒了, 大細媽飛撲來接我返屋企. 佢地見我一刻, 我仲好迷糊.

171105秋日晨操

秋涼, 唔怕會太熱, 可以又瞓足先起身.

171104香港仔水塘自然教育徑

今日行程, 本來係上星期安排, 原定今日行西貢, 但驚頭頂有雨, 怕婆婆行滑泥路, 昨晚決定來香港仔水塘.