亮閃閃, 常歡笑

洛洛一向都唔鍾意食粒粒糧, 但唔知點解, 自從轉左全home made後, 反而唔太抗拒. 重可以當零食添. 哈哈…可能物以稀為貴, 又或者佢真係好唔鍾意食舊嗰隻牌子嘅糧啦. 婆婆下午會畀一匙仔粒粒糧佢食. 佢都可以食晒ka.

每晚佢食完飯無耐, 玩完波波就會情深款款, 眼仔閃閃咁望住我地. 即係代表佢想食零食. 而細媽就會同佢講 : 你想亮閃閃牙. 洛洛就會好興奮同搖晒尾咁. 細媽就會安排幾粒糧畀佢食. 自此亮閃閃就成為粒粒糧嘅代號喇.

但點解要用代號?? 咪就係D傻媽咪驚洛洛聽到係畀粒粒糧, 洛洛會唔食囉!! 都算佢地用心良苦啦.

洛洛: 傻嘅, 其實亮閃閃只限於係屋企, 出街就緊係食雞雞啦. 佢地真係天真媽咪呀.