200807老年失禁了?

由年初開始, 好多時早上瞓醒, 我大脾都有濕, 細媽有半夜見我用脷舔腳, 一直以來, 因以往腳仔有肉粒, 我都係咁行為. 但好似越來越過份, 最近都濕得好過份. 細媽話點解我半夜唔瞓咁無聊. 但又真係有狗狗會咁囉.

最近, 媽咪在家辦公成個月, 星期二早上, 佢發現我明明熟睡, 無舔腳同肚仔, 但竟然濕左. 又見地上有一滴一滴水滇, 覺得好怪, 同細媽講, 懷疑我有失禁現象.

到星期三早上, 媽咪開工時, 一路留意我瞓覺, 見住我大脾位同肚毛都濕左, 抱起我時, 我睡眼惺忪. 馬上幫我清潔. 但我清醒時, 我係識得去廁所同無尿滴. 要觀察下.

星期四早, 又係咁呀. 媽咪醒起我有條紳士腰封, 馬上加條 M 巾幫我防漏. 仲打電話去診所問可以點做, 現在轉左陳醫生, 佢剛好放假, 姐姐問左情況, 話幫我記得資料, 星期五問醫生.

星期四晚睡覺, 我有用腰封, 星期五早上起身又無乜濕. 點知, 我食完早餐再瞓時, 條巾一陣就濕晒, 媽咪換另一條, 我又瞓返, 今次仲多到漏出, 腰封濕左. 媽咪諗到用快乾毛巾加山型夾來頂住先, 但好快又第三條濕左. 中午, 診所哥哥打來, 話醫生回覆左, 建議先幫我驗尿, 再決定. 仲話傍晚 5 點剛好有一個位. 媽咪當然話好.


我地早10分鐘到, 登記一磅 : 5.6 kgs. 過左 5 點, 仲未見掛陳醫生掛名牌, 點解 ?

等到差不多到17: 10, 終於叫我地.

醫生問返詳細, 佢話同割脾臟及牛蜱熱復發無關, 手術時, 係觸動唔到膀胱. 有機會係老年, 膀胱括約肌鬆弛. 先抽尿驗來睇下分析.

報告出, 尿比重正常係 1.03, 而我係 1.018 , 因為飲水多左, 所以尿色淡, 尿量多. BLD係血含量, 因係用針插入尿道, 所以一定有輕微驗到, 無問題. 其他都顯示為 Negative 或 Normal 都好好.

另一個報告, UPC (尿蛋白和尿肌酐比值 )低於 0.5 , 即係腎功能在正常範圍.
暫時結論, 我應係老年了, 膀胱括約肌在瞓左時鬆弛. 另方面, 係有藥可以控制, 但醫生話我現在食緊其他藥, 唔想我再食多種藥, 以免加重腎臟負荷.

醫生話可以多放幾個廁板, 等我想去尿尿時, 唔駛行太遠入廁所. 另外, 年紀大, 我後腿比以前無咁好力, 腳底毛修短防跣. 如果屋企可以放防滑墊更好.

晚上瞓覺, 可以在床鋪尿片, 如果想用尿褲, 最好只在晚上睡覺使用, 日間唔好, 以免影響皮膚.

暫時留意下情況, 等 22/8 覆診時再定.

都好, 唔係腎病, 但都要多加注意. 媽咪在未同我出門時, 上網搵定男仔尿片, 細媽話買定先囉. 有備無患.