130126挑戰梧桐寨瀑布上大帽山

想夢想實現都拖了幾年, 媽咪一直怕濕滑, 路程又長, 唔敢貿然去梧桐寨瀑布, 究竟繞一圍回返梧桐村走, 定係上埋大帽山, 又或由大帽山停車場起步落瀑布, 憂慮好多.....
經潮汐大師細媽神算, 決定在黃梅時節前, 挑戰呢條線, 上山容易, 一於由梧桐寨村同慶堂起步, 最多難行的話, 原途折返....
媽咪前日突然有腸胃炎, 又嘔又肚痛, 睇完醫生食點藥, 今早感覺良好, 一於朝早出發, 我地在大埔車站坐的士, 用左$62.5 就直接入到村, 咁就避了行一大段車路....
點知一落車, 有隻村狗即走來吠爆, 我一直在袋唔敢哼一聲....



我當然唔敢落地, 嘩, 真係有惡犬, 細媽見屋內有一隻大狗又吠, 惟有抱我再行入D先....

過左村屋, 我安全喇....

沿萬德徑行...


越過萬德苑牌坊

太早了, 萬德苑仍未開門....

靠萬德苑右邊就見有路牌指示往梧桔寨瀑布...


上井底瀑同中爆都唔算難...

到分岔位...


一係行石級直接去散髮瀑....

我地目的係去探晒所有瀑布, 一於靠右行....

其實上井底瀑, 間中都有似危險的崎嶇石級....

來到第一個井底瀑, 因要行落去欣賞再回頭, 婆婆決定留在原位等我地....

旁邊都有鐵鍊防墮下...

井底瀑只約 5 米高, 但我怕流水聲, 好驚呀...

有大細媽傍實都好D...

睇完又上返小徑匯合婆婆...

好快又到中瀑...

又名馬尾瀑, 高20多米...


呢度安全, 婆婆可以一齊合照...

離開中瀑, 有告示話前段因早前韋特森影響, 有樹倒塌及山泥傾瀉, 去唔到主瀑好掃興o架, 我地決定上去睇情況再決定...


原來有兩位叔叔正在維修山岥, 佢地話我地好彩, 如果昨日來, 一定唔可以通過, 成功過晒維修路....

上主瀑, 開始比較崎嶇不平, 石級又多地衣同青苔, 近排無雨, 路算乾爽...

一路係咁上....


未到主瀑前, 有個分岔位轉右, 細媽又八下....


原來有個無名瀑, 媽咪之前上網搵資料, 都好少有人來.....

我地再攀過大石, 又係另一美景, 好彩無走漏眼....

成段路都要小心翼翼.....

有條咁企棧道 @.@

石級又大, 我唔敢落, 細媽抱我落去....

旁邊係懸崖, 一不小心就易直墮落河...

來到第四個瀑 : 主瀑又名長瀑...


成30多米高, 雨季來臨, 瀑布更壯觀....

婆婆, 你好口渴咩


因為上網話因1993年, 連接主瀑同散髮瀑一段10分鐘路, 有山泥傾瀉, 大樹倒塌, 路段切斷, 有路牌叫人原路折返, 但媽咪見都有人行, 一於搏下, 帶埋手套, 準備四腳爬爬上...

上散髮瀑係要越過主瀑, 靠右邊見幾棵蕉樹直上....

媽咪見唔到網上相片寫有 : "前面山坭傾瀉, 請沿來路折返" 的大木牌, 也無大樹倒下, 只係全條路係大碎石....

婆婆話好好玩, 又唔太難...


只係變左四腳爬o者....

大碎石路只係十多分鐘搞掂, 我地上山, 一直見好多我身後的大石洞....


以前散髮瀑旁都有 "前路不通" 路牌, 現在不見了, 可能政府早排已經處理好晒, 主瀑同散髮瀑接過返...

散髮瀑水流弱了點, 未能如秀髮般散開....

怪不得啦, 上流水咁弱....

既然玩晒咁多個瀑布, 仲未到12點, 亦已經上到400多米, 前路唔難, 一於上埋大帽山...

穿梭竹林中...


又到分岔位....


見地圖就明確各瀑布位置, 除了中瀑及主汳之間的無名瀑....


其實上來時, 媽咪都見有告示話中瀑同主瀑封閉o架, 但相信稍後會開通返....


落返林錦公路都係個多鐘....


我地要挑戰埋香港第一高峰....

又係無窮無盡的幸福天梯....

昔日17世紀, 大帽山一帶係茶園, 一級級梯田仍隱若可見....

坳位就係四方山涼亭, 加油....

上呀上, 我地由海拔100米上到700多米的四方山....

接返麥理浩徑第八段 M144


一邊係去鉛礦坳, 最近落碗窯走都好遠....


我地繼續上大帽山...

一路太斜上, 媽咪開始感好攰, 雙膝蓋又有想抽筋現象, 成日都係得佢一個係咁, 名副其實係弱人....


婆婆, 你又偷鍚石頭人

見波波建築物啦....

仲欠一小段....

婆婆擺出勝行姿勢, 僅係啦, 佢已經在一年內完成晒香港三個最高峰 : 大帽山 / 鳳凰山 / 大東山....


我地最多去到 930米, 因為最高位 957米係禁區....

但我地由 60米上到 930米, 我地已經好心滿意足...

落山了, 九曲路, 有排轉...


好似媽咪2010年去的富士山, 下山路唔見底....

落山途中, 媽咪雙膝旁肌肉又想作抽筋, 行得好慢, 好彩佢停低一陣, 鬆鬆下肌肉, 最後都無抽筋...




終於落到停車場, 靠右可以落川龍, 下次先了...

我地沿麥理浩徑行, 唔行車路...


難得上到咁高, 煙霞蓋滿整片天空, 唔能夠欣賞山下景色....

起步時, 細媽抱下我, 見我大脾位紅了, 仲有成10幾粒肉粒腫起, 細睇下, 原來似俾野咬, 大細媽詳細檢查我肚仔附近, 發現了三隻約1/4粒芝麻大的小牛蜱, 一隻係淡橙色, 一隻淺啡, 一隻深啡, 唔知仲有無走去身體其他地方添....


成山周不時有牛蜱上身, 搽乜都無用, 佢地都唔想跟我走, 我一行就掃左佢地上身, 天意o羅.....


去到M154, 我已經好攰, 細媽怕我太累, 抱我行埋餘下一公里....


4 點半就到荃錦坳, 全家好開心, 因為挑戰成功

 8:37am梧桐寨村同慶堂→8:53am萬德苑→9:25am井底瀑→9:45am中瀑→10:21am無名瀑→10:46am主瀑→11:28am散髮瀑→12:04pm上大帽山交接位→13:24pm四方山涼亭→麥理浩第 8 段M144→14:32pm大帽山 930m→16:31pm荃錦坳
全程 11km, 人家約行 5-6 hrs, 雖然我地用左接近 8 小時行又影瀑布兼休息, 由海拔100米上到最高位930米, 已經覺得以我地老弱殘兵一條Dog四口組好叻, 超晒標喇
仲有計劃準確, 選擇冬季乾爽日子來, 避開雨季同潮濕天氣, 當然瀑布在雨後, 必定氣勢更磅礡, 但相對來講, 對我地有埋龜速婆婆, 好危險o架....
剛回到家附近, 就開始落雨, 仲越夜越大雨, 好好彩呀