230122兔年初一

今日係兔年初一, 沒有家洛的第一年農曆新年, 生活要過, 就安排初一睇晨早場 - 毒舌大狀.

睇完戲, 打電話返屋企, 問佢願唔願出來食午飯, 竟一口答應, 細媽去搵邊間開同有搵位, 我就返去接婆婆出來, 分頭行事. 可能多數人要等大檯, 細媽好快就有位通知我地.

三個人, 點個小套餐同個十全十美點心都足夠.

有蝦餃, 燒賣, 黑松露餃, 紫薯醒獅包同紅棗糕, 每款兩件, 婆婆夠晒食力, 除左食半件紅棗糕, 其餘都係一件, 哈哈.

個紫薯醒獅包唔細呀, 食得是福呀.

太耐無出街行, 婆婆在公園吸啖清新空氣, 抬頭望下高樹, 希望婆婆腳仔生性, 咁就可以同佢行遠些.