210626覆診日

 過左三個月, 又要來覆診, 媽咪返工, 今日全程由細媽負責, 晨早落大雨, 早落樓, 無的士, 惟有趕去坐小巴.

來到診所未正式開工, 要在門外等.

到左變震震狗, 我知又要留低, 登記好上磅, 5.9 KGS, 跟住肥哥哥接我入去, 細媽就先回家.

今日除左覆診外, 媽咪昨晚幫我清潔梳毛時, 發現尾部有焦, 馬上抹走無, 見有黑印, 怕同上次肚仔咁有霉菌, 一拼叫醫生檢查.

本來抽第二次血後, 就可以先回家. 哥哥打來話因為驗血時, 發現肝酵素高左好多, 醫生話要照埋超聲波睇下乜事, 同埋見肛門腺位漲, 幫我擠左好多肛門腺液出來. 

13:15, 媽咪終於接電話, 細媽馬上來接我. 一出門, 細媽一眼關七,一見的士, 馬上跳上去, 司機叔叔問係我來睇醫生, 仲叫細媽抱緊我先開車.

返到屋企, 馬上去廁所同食野飲, 好攰呀, 要休息.

細媽仲發現, 解開我身上辮子橡根, 有斷左肚毛毛, 剷左好多毛毛來照超聲波呀.

細媽下午五點再返診所聽報告.

超聲波結果, 肝臟同以前差不多, 都係有點點同粒粒, 形狀不太齊, 之前都提過, 老狗都會係咁, 有問細媽會唔會好想積極搞個肝, 即係要開肚抽肝組織化驗, 細媽話唔會, 食得走得就算, 唔想我又捱一刀. 醫生都話呢個年紀唔建議, 就算做左, 都唔會話會活多好多年.

至於肛門腺, 醫生話嚇一跳, 擠左好多出來, 問我有無磨屁屁, 咁我又無囉, 媽咪每星期沖涼前, 都有擠, 但都擠唔到, 以為無野, 可能係用錯方法.

仍有少少貧血, 但 HCT同上次都差不多.

腎指數高左少少.

腎上腺指數 CORT降至 33nmol/L, 可以調低 Vetroly 劑量為 10mg.

醫生問有無其他特別野, 細媽話我老人痴呆嚴重左囉, 三個月後再覆診.