220409覆診日

又係相隔三個月來覆診.

因為上星期, 每晚食完晚餐, 一上床準備瞓就嘔, 晚晚都要清潔, 細媽好心慌, 幸好今星期無乜事. 早排潮濕, 身上多左霉菌黑斑, 好彩沖左三條毛同呢排乾燥返, 皮膚好左. 在家上磅係 5.7 kgs, 在診所係 5.6 kgs.

疫情關係, 只可一位家長陪入去看診, 呢個當然係由媽咪負責, 佢要詳細將我情況報俾陳醫生知道. 

醫生話我唔算太瘦, 係老左, 背脊椎骨拱起同後腳無咁好力係正常, 亦了解左同檢查我皮膚狀況. 我係想食野, 但又唔願自己食, 要細媽手餵同用針筒餵, 醫生摸過口水腺唔覺有問題, 佢話我應係要嗲, 想大細媽餵食, 肯食就得. 

我要先留低, 大細媽在12點半返來接我.

大細媽無諗過今次真係12:30就得, 未夠鐘, 姐姐已打電話催媽咪來, 因醫生有另一急事要處理.

醫生話HCT 31.8%, 同上次31.7%差不多, 而肝酵素超標, 要再稀釋化驗, ALKP指數係 4322 U/L, 馬上同我照超聲波. 

發現肝臟有腫瘤即肝癌, 大約 5 x 4 cm, 上年26/6覆診照時, 肝臟有點點同粒粒, 當時都決定唔搞咁多. 醫生話我年紀大, 做手術割除, 唔一定咁易康復, 而且做化療係好辛苦. 開左一個隻肝臟補充劑護肝. 媽咪當刻係好唔開心, 但我今年情況係弱左, 又過17 歲, 一早有心理準備要接受我老了.

由上年到現在先長成腫瘤, 即暫時屬於慢性, 當然唔排除突然轉急性. 係怕肝臟血管爆而內出血, 要媽咪多留意我瞓時會否叫極唔醒, 同面色轉白, 係就馬上返診所睇急症. 

反正腫瘤唔會痛, 只係會比以前易攰, 盡量多休息, 我想食就俾我食, 避免高脂高蛋白質, 開開心心咁生活就夠. 

腎上腺同尿指數保持穩定, 可以6 個月先返來驗腎上腺指數. 如果早途發現有變就提早返診所.