260118洛婆婆畢業了

家洛，婆婆今午出發去另一個角度喇，我記得你話會等我地一家團聚，婆婆膽小又係I人，你先來引領婆婆，等佢唔駛驚，幫我地照顧住婆婆。

 (1939-08-21七巧節 - 2026-01-18 13:10)

250903護士覆診檢查

幾年無記錄, 今日係16:00到綜合模式護士診所覆診見護士, 在2樓(24號房)門外等候.

基本數據, 連衫磅重 48.6 KGS, 身高154.7CM(矮左, 助護話我可能無伸直企), 血壓 117/67, 心跳 81, 助護話幾好, 跟住返 1 號房檢查, 重新提我唔好食中成藥/補湯/涼茶/酒, 又其係保濟丸, 腸胃痛食粒必利痛, 食益生菌都得. 再解釋驗血報告, 無貧血, 驗唔到乙肝病毒, 甲胎蛋白指數係2, 其中creatinine肌酸酐高左少少(88 mmol/L), 飲多些水, 以減少腎臟負荷.

跟住做肝纖化掃描 Fibroscan, 護士好仔細檢查, 原來今次比上年高左, 佢話踩界, 所以量多好多次, 佢話有可能量度唔同位置, 有不同指數, 但無脂肪肝, 護士話食藥可以抑制病毒. 下年9月22日再見護士.

肝纖化掃描記錄:

14/11/2008 : 8.3 kPa

11/11/2010 : 10.7 kPa

21/12/2012 : 14.0 kPa

17/10/2014 : 5.4 kPa

24/12/2014 : 4.9 kPa, CAP 243 dB/M.

21/12/2016 : 6.1 kPa, CAP 216 dB/M.

27/11/2020 : 6.7 kPa, Bonderline Fibrosis (邊緣型纖維化) 係 6.1 - 9.0, 我踩界. CAP 210 dB/M , 呢個指數睇有無脂肪肝, 我在正常範圍呀.

06/10/2021 : 5.3 kPa, CAP 124 dB/M.

22/09/2022 : 4.6kPa

12/09/2023 : 4.8 kPa (印象)

26/09/2024 : 5.6kPa

06/10/2025 : 7.6 kPa 踩界, CAP 175 dB/M

 

250701臨時有蓋屋

昨晚接近12點，大媽在房聽到BB鴿又大叫，大媽心諗收工返來，無見過鴿媽來餵食，竟然落大雨就來，咪走去八下卦，原來大雨撇入花槽淋濕左鞋盒致塌陷壓住，所以BB鴿大叫救命，其中一隻逃走到出來，大媽即喺屋企搵材料，整個臨時有蓋位，拎起濕透鞋盒，有一隻困在內，放個膠盒入去，佢地好快識入去避雨😊

鴿媽今早有返來餵食，見BB鴿肚下未長羽毛，希望佢地唔好太百厭跳上跳落，好驚高空墮樓🙈

250629鶵鴿

近幾日，細媽在廳，間中聽到咕咕聲，出門窗望，見有隻鴿在花槽，靠近即飛走，跟住就無左聲。今早細媽又見鴿企在花槽，今次好清楚有微弱咕咕聲在花槽發出。

250419洛婆婆又入院

洛婆婆今年踏入86歲，今年16/1至19/1都試過第二次腳腫，引致傷口潰爛有少傷口滲體液，要入院消水腫，早在上星期見佢腳腫，都有定心理準備。 

 前晚發現左腳又潰爛了一小攤，已馬上碘酒消毒蓋藥棉，昨晚見藥棉濕晒，都知不妙，馬上消毒用m巾包好，執定走佬袋，準備今早去急症室。 可能大批人離港，急症室竟然好少人，又或喺婆婆算半緊急，好快有醫生檢查照超聲波同X-光，由入急症室到上病房，只係兩個半鐘，今次真快，入院安頓有照顧，會安心.

250129黃盛盛

不經不覺, 到今年四月, 我家盛盛就年界17歲, 文案寫珠頸班鳩壽命係10-12年, 似乎盛盛已打破記錄, 相處多年, 周不時我地返家, 佢就咕咕叫打招呼, 或者投訴無紅米米, 有互動呀。

自幼雛在黃家長大, 又斷了指趾, 如果當年唔埋佢, 都大機會俾細路掀走玩。

盛盛, 要繼續健健康康, 想要食米米就出聲吩咐啦^^

241019黃家新成員 - 螈螈(東方蠑螈)

前日屋企養左10幾年最後一隻蠑螈，都回天家。 為免洛婆婆一人在家無嘢陪伴，今日在金魚街，兜左轉以為落空，唔放棄又重新行一轉，金晴火眼下，終於搵到一間有蠑螈嘅店，仲係最後一對，洛婆婆終於有新螈螈陪傾歇💓

241001愛的陪伴

今日係家洛肉身化為輕煙兩週年，但佢仍常陪伴我地，所以今日只係帶家洛出去兜個圈，太曬喇，陪我地食個午餐，行一陣就回家🥰

240928給愛兒家洛

闊別兩年了，家洛，近排係咪都常回來陪我地周圍去呀，我有感應到㗎🥰 

知你決定在天家修練住來等我地日後回天家重聚，知道你亦好錫大細媽。 

我每日都望著你呢張相，也常常翻睇你嘅影片，就係驚一旦老了會忘記以往，期待日後重聚❤️

240228家洛19歲了

家洛，細媽收工時，買到你最愛嘅芒果雪糕來慶祝你19歲生日，係咪好香又凍凍涼涼，好好味呀

230928小天使一週年

家洛, 今日係你成為小天使一週年, 仲好掛住你呀, 細媽媽買左你至愛嘅芒果雪糕俾你, 好味嗎?

好想同你傾下歇呀 ^^

 

230916糖義工-探訪長者

 我地三兄弟陪大細媽出街, 先食午餐再坐巴士出發去香港仔.

230908百年一遇的黑雨

設立左黑雨警告以來, 通常都係個多鐘就轉紅雨, 但今日打破了.

受【海葵】殘餘相關嘅低氣壓影響帶來豪雨, 黑雨維持左16小時35分鐘. 暴雨令山上雨水帶黃泥衝落來, 龍翔道中間石屎躉剛好阻左黃泥水往南流, 變成南北極咁, 引敔雨水湧入黃大仙地鐵站, 再流入月台同列車管道, 地鐵部份路段停駛. 黃大仙中心北館低層亦全層被沒頂, 要派多部抽水車泵走泥. 多區水浸, 雨水夾泥成河, 地面都好混亂, 公共交通受阻.

230901蘇拉10號颶風信號

由家洛2005出世年，都經歷過3次10號颶風信號，2012的韋森特，2017的天鴿，2018的山竹。

今日沒有家洛在身邊，超強颱風蘇拉襲港，天文台在20：15改掛了10號，家洛，唔駛怕，我地全在家好安全，你靠近我地身邊就得^^

230805WAVES尾場

 昨日唔夠時間影BOOTH, 打算早些入去亞博, 落車見FC為今次安排嘅專線, 可惜我地搭嘅無啦.

230804WAVES第三場

唔係MIRO, 少左一個機會, 搶唔到公售, 唔JOIN PLAN, 抽獎又知機會微, 預左睇ONLINE, 23/7無聊八下牛牛, 發現比我地想像中可以接受, 係尾場兩倍半起跳, 位置好更貴, 預計尾場係ONLINE, 細媽話不如揀星期五感受現場氣氛, 星期六睇ONLINE. 馬上行動, 星期一晚拎飛, 第一次買牛, 又驚係假, 雖然都有即時照紫外線燈, 又上網睇點駭真假, 但本身無紫外線燈, 晚晚拎出來摸又驗藍logo XD

到25/7晚, 糖們討論尾場時, 心郁郁, 26/7早返工, 見有牛放個尾場價目表又平喎, 問問細媽, 又都話原來想去埋尾場, 叫我問明姐, 最後揀左同區前後幾行. 晚上即拎飛, 有照有驗, 真係又緊張起來, 始終代買, 驚假野. 上星期六送飛同應援上明姐家, 佢有紫外線燈, 佢兩張都係明顯照到. 我跑返屋企拎晒自己四張再去佢屋企照, 尾場同佢地經同一牛, 但星期四係唔同牛, 竟然點照都見唔到, 明明拎飛時見有, 最後左照右照先見隱約少少, 又驚過. 原來好多糖直接拎官方飛都係相同情況. 又無出現過假隊友飛, 自我安慰中.

終於到4/8, 請半日假早入去, 先同小姜小濤影齊第4-11胎作品.

230729KT義工派飯

今日又參加義工派飯, 同一飯堂 - 香蕉飯堂. 準備裝飯盒.

230709可愛迷你姜兔

 Hi, 我係迷你姜兔, 今早負責陪細媽行下晨運.

230708五兄弟遊公園

今早好天, 細媽避開猛烈陽光, 一拖五兄弟出發行公園.

230707 洛細表 THEi BA fashion show

霎眼間, 洛細表姊又大學畢業, 今晚有入場卷去參加畢業入圍作品展. 佢媽咪託大媽代安排買束花.